EDITORYAL – Lunop ug baha

Kun dili lang gani gihapon masulbad sa administrasyon ni Mayor Michael Rama ang problema sa kanunay’ng paglunop dinhi sa dakbayan sa Sugbo karong daghan na og kuwarta ang dakbayan, angay na gayud nga masuko kaniya ang katawhan.

Ang problema sa paglunop sa ubay-ubay’ng mga dapit dinhi sa dakbayan angay gayud nga hatagan kini og dako’ng pagtagad sa kagamhanan.

Kun gahinan man og dako’ng kantidad ang pagsulbad sa problema sa lunop, angay nga superbisahan kini pag-ayo ang pagtrabaho aron masiguro nga dili lang binuangan ang proyekto.

Angay usab nga dili babagan sa mga konsehal ang pagpatuman og mga anti-flood projects tungod kay daghan kaayo ang mahasol kun maglunop ang dakbayan bisan sa hinay lang nga pagbunok sa ulan.

Daghang mga drainage projects nga gigastohan og minilyon ka pesos dinhi sa dakbayan sa Sugbo ang wala gayud kapahimusli ug wala makasulbad sa paglunop.

Unsaon, gipatuman ang mao nga mga drainage projects nga dili konektado sa uban nga drainage system. Masabot kaayo nga basta lang kay ang mao nga proyekto nahuman ug nakakuwarta ang mga kontraktor nga higala sa mga opisyal sa City Hall.

Sa pagsulbad sa problema sa lunop ug baha, kinahanglan nga si Mayor Rama motudlo gayud og tawo nga iyang tugyanan sa pagsuperbisar sa pagpatuman na sa proyekto.

Tawo nga adunay panglantaw nga masulbad gayud sa hingpit ang problema sa paglunop dinhi sa dakbayan. Adunay mga tawo nga suweldo ra ang giapas ug wala maglantaw sa kasulbaran sa problema sa dakbayan.

Ang atong mga Gabion dam sa kabukiran nga mopugong unta sa pag-agos dayon sa tubig dinhi sa kinaubsan, wala na matagad ug puno na sa lapok. Kun gihaw-asan pa kini sa lapok maibanan unta ang problema sa baha.