Grace Poe miangkon

Maayo kay giangkon ni Senador Grace Poe nga ang pagkainila sa usa ka tawo sa mga survey dili maoy basehanan nga siya haum na nga molansar pagka pangulo sa usa ka nasud.

Si Poe kanunay nga nag-una sa mga survey sa mga tawo nga gitan-aw nga nagtinguha nga mahimong presidente  ug molingkod sa Malacañang gikan sa 2016 hangtud sa 2022.

Daghan man gud sa mga gikuhaan og pamahayag atol sa survey nga tingali nagtuo nga ang kasikat maoy basehan nga haum na mag presidente ang usa ka tawo. Dili tawon ingon niana ang basehanan uy.

Kaniadto, ingon usab niini ang akong huna-huna. Apan sa ngadto-ngadto, nakasabot ko nga dili diay maayo nga kita’ng mga botante magpasagad sa atong pagpili.

Basin unya og uwahi na ang atong pagmahay. Kinahanglan nga ang tawo nga tugyanan nato pagdumala sa atong nasud mao ang usa ka ligdong, adunay igo nga kasinatian sa pagdumala sa kagamhanan, ug labaw sa tanan -- dili kurakot ug dili kurap.

Bahin ni Grace Poe, wala siya malambigit og mga kaso sa kurapsyon apan duha pa ka tuig siya nga nahimong senador. Kuwang siya og kinaadman sa executive functions pagdumala sa kagamhanan.

Dili imposible nga kun makadaog si Poe, igo lang siya nga magsunod-sunod ug mopirma lang dayon sa mga sugyot sa iyang mga advisers. Sama ra unya siya og “dummy president.”

Ang laing tawo nga gitan-aw nga molansar pagka presidente mao si Davao City Mayor Rodrigo Duterte. Aw si Duterte hinuon, may kasinatian na kabahin sa executive functions.

Lain ‘sab ang gikahadlokan sa katawhan kay nabalaka sila nga daghan kuno nga patay kun si Duterte mahimo nga presidente sama sa nahitabo didto sa Davao. Unya, si Vice President Binay suheto ‘sab kay nahimo na man nga mayor sa Makati City ug ikaduha’ng pangulo sa nasud. Apan ang problema lang ni Binay kay nabulit sa pasangil kabahin sa kurapsyon.

Hangtud nga dili pa ma-clear si Binay sa mga pasangil nga nalambigit siya’g kurapsyon diha nga mayor pa siya sa Makati, kuyawan ta uy nga siya ang atong himuon nga presidente.

Si DILG Secretary Mar Roxas gusto ‘sab nga mag-presidente. Suheto si Mar sa pagka magbabalaod kay dugay siya nga nahimong senador ug nakahupot og mga executive functions isip kalihim sa DOTC, DTI ug DILG.

Apan labaw sa tanan, si Mar wala gayud malambigit bisan usa lang ka kaso sa pagpangawkaw og salapi sa kagamhanan. Kamo, timbang-timbanga ninyo pag-ayo kun kinsa kanila ang angay mag-presidente.