Mayweather nanghambog na sab

Nakapanglantaw tingali nga mohinay g’yud ang halin sa tiket ug pay-per-view sa umaabot nga Mayweather-Berto Fight didto sa Las Vegas, Nevada unya sa Septiyembre 12, ang hambogero nga Amerikanong itom mipabuhagay na ‘sab og lami kaayo’ng saad.

Matud pa sa guwatsinanggo ay: “With the way he (Berto) comes and with the way I’m going to come, if it’s not a knockout, there’s going to be some knock downs. A lot. And there’s going to be blood. There’s going to be knocked downs and there’s going to be blood. A lot.” Gibalikbalik pa!

Pagka-brayit g’yud ni Floyd Mayweather Jr. mobuhat og sales talk. Makabuhi’g patay. Makapaulpot sa naglingkod! Ang pangutana: Kanus-a ba nga ang iyang gisaad, gituman?

Maisip gani nga “boring fighter” kini si Floyd, labi na nga siya g’yuy gipadaog sa mga judges bisa’g sige lang siya’g atras ug dagan palayo kay hadlok nga maigo sa daw puthaw’ng suntok ni Manny Pacquiao sa ilang away.

Negosyante’g utok si Mayweather. Usa ka segurista nga magpapatigayon sa kalibotan sa pamoksing. Dili siya makig-away ibabaw sa ring kun dili siya makabentaha.

Kinahanglan nga siya maoy makadawat sa dako’ng premyo ug siya ang magbuot kun kinsa’y iyang kontrahon? Kinahanglan nga siya ang mopili kinsa ang himoon nga referee ug mga judges.

Ug hapit na lang ang tanang kondisyon sa kontrata, si Mayweather ang magbuot. Wala pa gani ang away, sa mga papeles pa lang nga pirmahan sa magkaatbang nga boksidor uban sa iyang team, pilde na daan ang kontra tungod ning iyang kalaki.

Ang makapahibulong kay minilyong boxing fans magpailad lang gihapon.

Mokita ra ba’g dinagko. Kadto lang kataposang away nila ni Manny, subra sa $400M ang nasapi adto sa promoter, uy! Ug kinsa bay promoter adto? Si Mayweather! Shot sa taro, uy. Wa niya matuman ang pirme niya nga gipagarpar nga makig-bell to bell siya ni Manny.

Unya, karon ning umaabot nga engkuwentro nilang Berto, nanghambog na ‘sab siya nga kun dili niya nak-awton si Berto, iya kining nakdawnon sa pipila ka higayon pinaagi sa duguong panagsangka? Pag-sure, Floyd, uy!