Wa’y mituo ni Binay

Wala na g’yuy mituo ni Vice President Jejomar Binay kay nakasabot ang katawhan nga igo lang kini nga namolitika diha nga mi-deliver siya sa iyang State of the Nation Address (SONA) nga nagsaway kang Presidente Aquino kaniadtong Lunes.

Usa ka radio station dinhi sa Sugbo nag-survey kagahapon kun mituo ba ang katawhan sa SONA ni Binay. Pastilan, ang resulta 93 porsiyento mituo gihapon sa mga pamahayag ni Presidente Aquino atol sa iyang SONA ug siete porsiyento lang tawon ang misuporta ni Binay.

Sa ato pa, ubos na kaayo ang pagtan-aw sa katawhan kang Binay. Aw, bisan pa gani ang pipila ka dumadapig sa Team Rama dinhi sa dakbayan sa Sugbo nga akong gipangutana kun mosuporta ba sila ni Binay pulos nangyamiid.

Mura’g napanglantawan na nako daan nga imudmod g’yud ni DILG Secretary Mar Roxas si Binay dinhi sa dakbayan sa Sugbo. Kay bisan lagi ang mga suod ni Mayor Michael Rama nga akong gipangutana mitataw nga dili sila mobotar kang Binay.

Ang Team Rama maoy mipasalig nga mosuporta sa mga kandidato sa United National Alliance (UNA) dinhi sa dakbayan sa Sugbo. Ang ilang rason mao ang bati nga kredibilidad ni Binay nga wala pa gayud makalimpyo sa iyang kaugalingon gikan sa pasangil sa kurapsyon.

Husto man g’yud ang baruganan sa katawhan. Kinsa ba gud ang gusto nga ang atong nasud ipadumala nato sa tawo nga nabulit sa pasangil nga nangawkaw sa kuwarta sa kagamhanan?

Mao kini ang giingon nako kaniadto pa nga angay unta nga limpyohon g’yud ni Binay ang iyang kadungganan, apan wala niya himoa ug nagsige hinuon siya’g suroy-suroy ug nakig-boodle fight.

Nagtuo tingali si Binay nga ang pakigsawo niya pagpangaon nga magkinamot ngadto lang usab sa mga pinili niya nga dumadapig makapadaog kaniya.

Tan-aw nako, lupigon g’yud si Binay ni DILG   Mar Roxas kay wala kini malambigit og kurapsyon sukad-masukad.

* * *

Dinhi sa dakbayan sa Sugbo, nagtuo ko nga maapektahan ang kandidatura ni Mayor Rama kana kun magpadayon siya nga makig-abin kang Binay.

Nakasabot hinuon ko ni Rama nga mapugos siya pagsikit g’yud ni Binay kay wala man siya’y nasudnon nga partido nga kasandigan. Aw, kining ako mga pahimangno lang.

Nagpabilin karon nga surpresa kun kinsa g’yud kaha ang molansar isip bise presidente nila ni Mar Roxas ug Binay. Padayon pa hinuon ang partido Liberal nga nanguyab kang Senador Grace Poe aron makig-tandem siya kang Mar.