EDITORYAL – Pagsulbad sa trapiko

Tungod sa grabe kaayo nga problema sa trapiko sa mga karsada diha sa Mandaue paingon na dinhi sa dakbayan sa Sugbo, angay’ng kontrolahon na ang pag-agi sa mga dagku’ng trak sa mao nga mga karsada.

Angay’ng did-an ang mga dagku kaayo nga trak de karga nga magguyod og container vans sa pag-agi diha sa national highway gikan sa Consolacion paingon sa Mandaue kay sila maoy gitan-aw nga makapabara sa karsada.

Ang mga dagku’ng trak de karga tugotan lang nga makaagi diha sa national highway kun lawom na ang gabii ngadto na sa kaadlawon nga menos na ang mga sakyanan.

Unya, ang ubang mga motorista kinahanglang mopahimulos pag-agi niadtong Coastal Highway nga gihimo nga adto molusot duol sa simbahan sa Liloan alang niadtong mopaingon ug gikan sa amihanan.

Tungod sa nagkadaghan nga mga sakyanan pagka karon angay na g’yud unta nga dugangan ang mao nga karsada paingon sa amihanang Sugbo aron kalikayan ang dugang problema sa trapiko.

Kay matag tuig madugangan man og subra sa 20,000 ang gidaghanon sa mga sakyanan dinhi sa Sugbo ug ubang dapit sa Central Visayas, sigurado g’yud nga makasinati kita og problema.

Kinahanglan na g’yud nga ang kagamhanan pinaagi sa Land Transportation Office (LTO) ug Land Transportation Franchising and Regulatory Board (LTBRB) mo-estrikto nga did-an ang usa ka tawo pagpanag-iya’g sakyanan kun wala siya’y grahe.

Ang pagpataka og parking sa mga sakyanan daplin sa karsada kay ang mga tag-iya wala’y kaugalingon nga grahe sa ilang mga units maoy usa sa nakapadugang sa problema sa trapiko.

Unya, daghan pa nga mga sakyanan nga gubaon na kaayo apan gitugotan pa nga makapadayon sa pagdagan-dagan.