Kakabus

Dunay panultihon nga nagkanayon: Ang kabus o pobre ang di gyud mahadlok nga madato samtang ang mga dato mahadlok kunong mapobre!" Apan ang pangutana mao: Unsa may sukaranan nimo nga ikaw pagatawgon nga dato? Tungod ba kay daghan kang sakyanan, o daghan ka’g kwarta. Apan kun maghisgot kita og kakabus, mahinungdanon kini nga atong dawaton ingon nga sukaranan usab sa atong paghangop sa kinabuhing mahimong pagapun-on sa gugma ug panabang sa Dios.

Kini tungod kay di makasulod ang Dios sa atong kinabuhi kun kita mismo ang nagtuo nga nabatonan nato ang tanan nga giisip natong makapuno sa atong panginahanglan ug mga pangandoy. Kay ang tanan molabay lamang. Ang tanan mahanaw lamang. Ang tinuod nga makatagbaw kanato mao ang Dios nga maoy tinubdan ug katapusan sa tanan. Ug  kay kabus man kita, wala kitay angay nga ikapanghambog sanglit ang tanan dili man ato.