Nagpaabot ni Poe
Daghan nang gipul-an og paabot kanus-a mopahibawo si Senador Grace Poe sa iyang plano sa 2016–modagan ba pagka presidente, o pagka bise presidente, o tiwason ba ang una niyang termino pagka senador sa 2019. Dayong tuboy ni Presidente Noynoy Aquino ni Interior Secretary Mar Roxas sa makasaysayanon nga Club Filipino gahapon, naklaro nang mosunod:
Una, nibalibad na si Poe nga mag-runningmate siyang Roxas bisan, niya pa, way pormal nga tanyag kay pulos lang pasumbingay ang giluwatan nilang Aquino ug Roxas; ug
Ikaduha, napawong nang kahigayonan nga magpares silang Poe ug Senador Chiz Escudero (matud ni Poe mahimong managlahi ang ilang hukom ug matud ni Escudero managlahi ang ilang paagi sa paghukom).
* * *
Samtang natuman ang gipahamtang nga deadline sa pag-pormalisar sa pag-bendisyon ni Aquino kang Roxas, nga segun sa mga tinubdan tungod sa ilang pagtuo nga demalas ang buwan sa Agosto tungod sa daghang trahedya nga nahitabo sa pamilya ug pamunoan ni Aquino ning maong buwan, way makapugos ni Poe paghupot sa samang pagtuo. Mahimo pa siyang maghuwat. Sa Oktubre pa ang gitakda sa Commission on Elections (COMELEC) nga higayon sa pagpasaka sa certificates of candidacy (COCs). Makatabang sab ni Poe ang pagpaniid sa mga panghitabo sa mosunod nga mga adlaw. Kun magpabiling lig-on ang alyansa sa administrasyon alang ni Roxas, maapiki ang iyang ambisyon nga mag-presidente. Kun mabungkag, madasig pagtanyag sa iyang kaugalingon isip lab-as nga alternatibo.
* * *
Sud lang sa pila ka adlaw, nasaksihan ang pag-aslom sa relasyon ni Poe sa giisip niyang suod nga mga magtatambag:
Una, si Senador Serge Osmeña nibakwi sa pagbendisyon niyang takos nga mag-presidente, nihulagway niyang di pa andam ug angay’ng modagan una pagka bise presidente ug gihulagway si Escudero nga wa kinahanglana niyang bagahe; ug
Ikaduha, si Escudero, nga gihulagway ni Poe nga maoy labi niyang gisaligan tungod sa talagsaong mga pagsuway nga ilang nahiagoman sa kandidatura ni anhing Fernando Poe Jr. sa 2004, nideklarar nga di na mag-agad ni Poe ang iyang plano sa 2016.
* * *
Makapangangkon si Poe nga tinuod siyang independente. Gisalikway niyang mga tambag ni Osmeña nga nakatabang sa iyang pagpanghawod sa piniliay pagka senador sa 2013 ug gibasura niya ang pag-apura ni Escudero sa ilang panag-pares sa 2016. Apan mahimo sab siyang kapasanginlan nga ahat. Lantip ug ligdong apan di pa andam sa mas rubo nga binangilay sa politika. Nideklarar na og gubat batok niya ang oposisyong United Nationalist Alliance ni Bise Presidente Jejomar Binay. Makasugakod ba sa pagbuwag gikan sa administrasyong Aquino nga iyang gipasidunggan nga nakasugod na sa pagpasiugda og makahuloganong kausaban nga makaayo sa katawhan? Makasugakod ba ang talagsaon niyang popularidad paglahutay sa linigwatay sa tradisyonal nga politikanhong mga puwersa sa nasud?
* * *
- Latest
