Wala pa mahuwasi

Wala pa gihapon mahuwasi si Presidente Benigno Aquino III sa iyang sige og banghag sa iyang giingong mga anomaliya sa nangaging administrasyon. Kini bisan pa man nga usa na lamang ka tuig ang nahabilin sa iyang termino.

Sa iyang ikaunom ug katapusan nga State of the Nation Address sa niaging Lunes, wala palabya ni Aquino ang panahon pagbatikos na usab kang kanhi presidente Gloria Macapagal Arroyo tungod kuno sa naghitak sa corruption ug kapalpakan sa nakalabay nga rehimen.

Wala gayud mapul-i si Aquino sa iyang sige og pag-atake kang Arroyo. Matag SONA, dili gayud palabyon niya ang pagpika kang Arroyo, kinsa anaa karon sa house arrest gumikan sa mga kaso nga giatubang.

Apan daghan na hinuon, ilabina ang mga ordinaryong Pilipino, ang gipul-an sa sige og banghag ni Aquino sa kanhi presidente. Matud nila nga nag-atubang na og mga kaso ang kanhi presidente ug nga anaa na sa korte ang desisyon.  Lima na ka tuig human mipuli si Aquino kang Arroyo sa Malacañang, apan lisod sabton ngano nga wala gihapon huwasi ang kasamtangang pangulo kabahin sa iyang mga akusasyon sa mga giingong kahiwian sa miaging administrasyon.

Siguro angay lamang nga atimanon ni Aquino ang nabilin nga mga bulan sa iyang termino. Adunay mas daghang problema nga angay hatagan og pagtagad ang presidente kay sa magsige siya og paghot sa iyang mga kaatbang sa pulitika.

Dili gayud ikalimod niining kasamtangan administrasyon nga naghitak gihapon ang mga problema sa nasud. Bisan pa sa pasiatab sa kagamhanan nga miasenso na kuno ang ekonomiya, nagkagrabe na hinuon ang kahimtang sa katawhan tungod lagi sa kakulang usab sa panginabuhian.

Dako ang panghambog sa kagamhanan nga daghan kuno ang nabulahan sa grabe nga pagsulbong sa ekonomiya sa nasud tungod sa mga maayong palisiya nga gipatuman sa administrasyon ni Aquino.

Apan ang pangutana mao nga nasinati ba sa labing ubos nga sektor sa katilingban kining giingon nga mga bunga sa tul-id nga dalan nga gipanghambog niining maong gobiyerno? Klaro nga wala gayud kun si Juan dela Cruz ang pangutan-on.

Hinuon wala koy duda sa sinseridad ni Aquino. Dili ikalis nga dako ang iyang paningkamot pagpalambo sa ekonomiya sa nasud. Apan usahay molikoy ang iyang liderato ngadto sa direksiyon nga magsige na hinuon og sungag sa iyang mga kaatbang sa pulitika.