Paghandom sa tangan-tangan

Dihang naghuot na pag-ayong trapiko sa Mandaue City, daghang nanaway sa pamunoan ni Mayor Jonas Cortes nganong way nahimo pagsulbad sa problema. Dihang gilusad ni Cortes sa niaging adlaw ang 60 ka adlaw nga eksperimento pagpahapsay sa trapiko, gisaway na sab siya nganong gipatuman ang kausaban sa mga ruta nga way kasegurohan mosalir ba.

 Ganahan si Cortes nga mosaling-it sa iyang mga pakigpung sa mga sanglitanan. Nakahibawo na tingali sa trahedya sa amahan ug anak nga nag-uyon-uyon sa mga tawo nga ilang nalabyan sakyan ba o di ang ilang kabaw hangtod nga gisakwat na lang nilang kabaw. Sa kadugay ug kagrabe na sa suliran, segurong sawayon gihapon bisan siya’y mangunay pagwarawara sa kadalanan.

* * *

May mga nasaag ug may tulo ka bangga sa mga sakyanan sa unang adlaw sa eksperimento. May mga motorista ug mga pasaherong nitiyabaw nga nisamot kalangay ang ilang biyahe ug may mga drayber sa PUJ nga nagbagulbol nga nitidlom ang ilang kita.

Apan may mga paniid sab nga mas hapsay ang dagan sa mga sakyanan sa kadalanan nga gihimong one way. May mga motorista ug mga pasahero sang mas dali nga nakaabot sa ilang destinasyon. Samang may PUJ drivers nga niangkong kinahanglan pa nilang suhituon ang bag-ong mga ruta. Apan sa kadugay ug kagrabe na sa problema, nihit nang pailob pagpaabot sa hingpit nga kasulbaran.

* * *

Ang konsuylo nilang Cortes ug ubang mga tagduma sa trapiko mao nga gipahibawo nilang katawhan sa wa pa ilusad ang eksperimento, lahi sa ubang local government units nga nituyo gyud og pakugang sa publiko uban ang panghinaot nga ang namugna nga kaguliyang makapugwat sa tanang hingtungdan pagtinabangay pagpangita og sulbad.

Apan tingali di pa igo ang usa ka semana nga kampanya sa kasayuran. O tingali imposible lang gyud ang pagpahibawo sa tanang maapektahan sa nag-ung-ong nga kausaban. O mosangpot gyud sa pasiunang kalibog ug kaguliyang ang bisan unsang pasiugdahan nga kausaban.

* * *

Inay kaluy-an angay’ng kasinahan ang kahimtang ni Cortes. Sama sa amahan ug anak nga gisigehan og libak sa ilang mga silingan, si Cortes gigasahan og kabaw: Ang kaguliyang sa trapiko naggumikan sa paspas nga paglambo sa mga patigayon ug panginabuhi sa Mandaue ug kasilinganang dakbayan ug kalungsoran, nga gisamotan sa nagkadungan-dungan nga mga proyekto pag-ayo sa kadalanan ug mga kanal.

Angay bang mosibog ang Mandaue ug Sugbo? O mohunong na paghandom sa hapsay’ng kagahapon ug moatubang sa mga hagit ug mga pagsuway sa mas gahob ug mas huot nga karon ug ugma? Tam-is nga handumon ang mga tangan-tangan ug mga tartanilya sa atong katiguwangan. Hangtod nga atong maamguhan nga mas sayon diay ang pagpislit sa bungbong pagpasiga sa suga ug pagtuslok lang sa app pag-book og taxi.

[email protected]