Gilubong sa kalimot!

Sa katapusang State of the Nation Address (SONA) ni Presidente Aquino iya na tingali nga nabatbat ang tanan nga gusto niya’ng isulti, apil na ang mga tawo'ng gusto niya nga pasalamatan, lakip na gani ang iyang hair stylist nga nag-asikaso sa pipila na lang ka lugas niya nga buhok.

Gani tungod sa katin-aw pa sa iyang panumduman, gidetalye pa ni PNoy ang mga maitom nga kagahapon sa iyang nasundan nga administrasyon nga kanunay niya’ng gibasol sa mga sipyat ug mga pagpangawkaw nga nahimo nga maoy hinungdan sa pagkapriso karon ni kanhi Presidente GMA.

Apan nahikalimtan g’yud ni PNoy ang pagpasalamat sa pagduyog sa tibuok kalibutan diha nga gihapak kita sa gamhanan nga bagyo’ng Yolanda.

Gipahambog pa niya ang pagkapatay sa mga terorista nga sila si Marwan ug Basit Uzman, apan wala hisguti ang tinuod nga mga bida, ang 44 ka sakop sa PNP Special Action Force nga mibuhis sa ilang kinabuhi aron pagsumpo sa mga terorista. Ngano man?

Simple lang, dili gusto si PNoy nga mahinumduman ang labing daku nga palpak sa iyang pamunoan. Sa paghapak sa bagyo’ng Yolanda natribokar sa tibuok kalibutan pinaagi sa report sa CNN ug ubang international media kun unsa kahinay ang gobiyernong Aquino pagresponde sa naasoy’ng katalagman.

Samtang bisan og gipadayag ni PNoy nga hangtud sa hangtud dad-on niya ang nahitabo sa Fallen 44, apan kini maoy naghatag og labing daku nga mantsa sa iyang pagka presidente diin nakita ang iyang "art of denial" aron lang masalbar ang iyang imahen. Labaw sa tanan ang Mamasapano issue maoy hinungdan nga nasangit ang gitinguha niya nga Bangsamoro Basic Law.

Alang kaniya mas maayong ilubong sa kalimot ang mga isyu nga nakapalibaong sa iyang "daang matuwad" kay segurado nga wala g’yuy padulngan ang iyang ituboy sa 2016 election kun ang iyang mga sipyat maoy mahinumdoman sa katawhan.