Brgy Nangka, Balamban, Cebu

“Maayo unta og butangan na’g mga suga ang karsada diri gikan sa eskina sa among barangay padu’ng na sa CNU kay ngitngit kaayo ug delikado sa mga mangagi panahon sa gabii.”

Brgy Tingub, Mandaue City

“Awhagon namo ang among mga opisyal sa barangay nga molihok na sila pag-atiman sa gubaon namo nga karsada. Atbang ra g’yud unta ni sa balay sa kapitan.”

Brgy Lorega, Cebu City

“Kanus-a pa man ni lihokon sa mga opisyal namo sa barangay ang mga poste nga hapit na matumba? Adto na ba sila molihok kun may madat-ogan na? Unya kinsa may angay silotan kun simbako may madisgrasya?”

Brgy Umapad, Mandaue City

“Maayo unta og atimanon na sa mga opisyal ang problema sa baha diri sa among lugar kay risgo sa mga bata kay magsige man og languylangoy kun magbaha. Basin matakboyan unya’g sakit tungod sa hugaw nga tubig.”

Brgy Mambaling, Cebu City

“Abusado ang mga trisikad drivers nga nagbiyahean diri sa elementary school kay imbes tag P5 ra ang plete kun mosakay ka apil ang bata paninglan man hinoon mi P10.”

Brgy Bantigue, Bantayan, Cebu

“Ang akong reklamo mao ang kabahin sa calamity assistance kay ang ubang tag-iya’g balay nga totally damage tag P30 mil unta ang madawat pero gipang-ibanan man og P7 mil. Unya naay ubang tawo nga wa’y mga balay giapil man paglista sa totally damage.”

Brgy Ibabao, Cordova, Cebu

“Naproblema mi diri sa daghang dispatcher duol sa Gaisano-Cordova kay kun masakyan mi’g lima ka pasahero dili man modawat og P2. Masuko pa g’yud usahay ug ilabay nila ang among ihatag ug manghulga ra ba dayon kini sila kun dili mohatag sa ilang gusto.”

Brgy Punta Princesa, Cebu City

“Diri sa utlanan sa among barangay ug sa Barangay Tisa naa may bar nga gi-operate kilid sa Tisa 2 Elementary School nga lain kaayo nga tan-awon kay agianan man ni sa mga estudyante.”

Brgy Lawaan 3, Talisay City

“Moreklamo mi sa driver sa truck sa basura kay grabe kaayo makapadagan. Bisa’g gamay kaayo ang karsada magpabulhot g’yud ug kuyaw kaayo sa mga tawo nga maglakaw labi na sa mga bata nga usahay magduwa sa daplin.”

Brgy Malbago, Daan Bantayan, Cebu

“Sa Sitio Looc daghan kaayo mi nga mga pobre nga mitiyabaw kay dunay mga naapil sa Pantawid Program sa gobiyerno nga gitawag og 4P's apan mga abroad man ang mga bana? Unya kami nga mga pobre nga angayan g’yud unta nga maapil sa maong programa, wala man hinuon tagda.

Brgy Poblacion, Minglanilla, Cebu

“Huot kaayo ang karsada diri sa Ward 2 kay gigamit nga parkingan sa ubang mga tawo ang daplin. Ngano nga wala man ni badlonga sa mga polis ug sa mga opisyal sa among barangay nga klaro man kaayo ni nga ilegal ang gihimo?"

Alang sa inyong mga reklamo text lang sa 09062973166