Mga pildero sa kasaysayan
Way kapaingnan ang reklamo sa mga alyado ni Presidente Noynoy Aquino nga gitakdang isang-at ngadto sa House Ethics Committee batok sa militanteng mga kongresista nga nisuliyaw atol, ug nipakita sa ilang mga plakard pagpanaway sa administrasyon human sa iyang State of the Nation Address (SONA) niadtong Lunes.
Kun imbestigahon sa ilang kaubanan, makaangkon lang ang mga sakop sa Makabayan bloc og laing kahigayonan sa pagtunglo ni Aquino. Kun masilotan, mas makabuylo lang sa ilang pasangil nga sa pagpanggukod ra sa politikanhong mga kaatbang maayo ang mga nagtungkawo karon sa Malakanyang. Gawas pa, hilantan na sila sa pangandam sa piniliay sa Mayo 2016 sa mosunod nga mga semana.
* * *
Niangkon si House Speaker Feliciano Belmonte nga nanlipaghong siya sa kauwaw sa pagbinastos sa iyang mga sakop. Apan unsa may iyang mahimo? Kapkapan na sa sunod nga mga SONA ang matag kongresista pagsegurong di na silang kapayuhot og mga plakard? O taptapan nang daan ang ilang mga baba aron nga di na makasiyagit samtang nagdiskurso ang presidente?
Ang pait nga kamatuoran mao nga gawasnon ang mga sakop sa Kongreso paghimo bisan unsa atol sa ilang mga sesyon ug bisan sa SONA. Kun makahimo sila pagpasundayag sa labing luho nilang mga sapot atubangan sa lapad nga katimawa sa katawhan, nganong di man mapakita ang ka wa nilay batasan?
* * *
Makapanghunaw hinuon ang militanteng mga kongresista nga igo lang silang nisunod sa ka way batasan ni Aquino. Nga way kukaikog nga nilaba sa usa sa mga dinapit sa Kongreso nga si Bise Presidente Jejomar Binay. Magamit nilang gitudlo sa katiguwangan nga angay’ng ihatag sa mga bisita ang labing maayong pagtagad, bisan unsay naa sa hunahuna sa tagbalay.
Matumbok gani nila ang nangaging pangasaba ni Aquino sa mga buhatan sa gobiyerno ug pribadong mga kompaniya nga nidapit niya. Usa nang National Irrigation Administration (NIA) kansang anibersaryo nikalit lang og aslom dihang iyang gisaway ang kadagkoan sa kapakyas pagpatuman sa irrigation projects sa mga lalawigan.
* * *
Apan di ang kuwestiyonableng batasan maoy labing dakong atubangon sa mga sakop sa Makabayan bloc. Kun dili ang ilang pagsumay-sumay ni Binay sa paghulagway sa pamunoang Aquino nga “manhid” ug “palpak.”
Gawas nga hilom sa gipasangil nga mga eskandalo batok sa mga Binay, pipila nila nikumpisal na sa plano pagdagan uban ni Binay. Magprotesta ba sab ang ilang mga dumadapig atol sa alternatibong SONA ni Binay? Mosuliyaw ba ug magwarawara og mga plakard atol sa diskurso ni Binay? O andam na ba silang mosalikway sa pagpaka aron ingnon ug hingpit nang mogakos sa nangalisbong bayhon ni Binay? Kanus-a pa man maleksiyon ang mga militante sa nagkataas nga kasaysayan sa ilang pagpili sa sayop nga bahin sa kasaysayan?
- Latest
