Bilib ni PNoy
Pasar si Presidente Noynoy Aquino para ni Cebu City Mayor Mike Rama. Nikumpisal si Rama nga padayon siyang nagpaluyo ni Aquino bisan gisalikway na siya sa Liberal Party (LP) sa niaging piniliay ug bisan sakop siya sa United Nationalist Alliance (UNA) ni Bise Presidente Jejomar Binay. Matud ni Rama bilib siyang Aquino kay wa pa mahilambigit og bisan unsang eskandalo sa kawat.
Nitataw hinuon si Rama nga mahimong mausab nang iyang sinultihan karong Oktubre kanus-a mopasaka na sa mga certifico de candidatura ang mga managan sa lokal ug nasudnong mga katungdanan. Mag-agad ang baruganan ni Rama kun kinsay bendisyonan ni Aquino nga opisyal niyang mga kandidato sa piniliay sa Mayo sunod tuig.
* * *
Sa paghukom sa mga nahimo ni Aquino sa niaging lima ka tuig, giawhag ni Rama ang katawhan sa paghinumdom unsay labing dakong hinungdan sa ilang pagpahimutang ni Aquino sa katungdanan: Ang paglimpiyo sa nangalisbo nga mga eskandalo sa labing taas nga mga buhatan sa gobiyerno.
Masaligon si Rama nga makasabot si Binay ug ubang kadagkoan sa UNA sa iyang padayong pagpaluyo ni Aquino. Nga bisan unsaon og tan-aw may pagka bakikaw kay apil man sa mga gipapriso ni Aquino ang labing dagkong mga haligi sa oposisyon nga silang kanhi presidente Gloria Macapagal-Arroyo ug mga kanhi senador nga silang Juan Ponce Enrile, Jinggoy Estrada ug Bong Revilla.
* * *
Human nipasangil nga determinado ang Malakanyang nga siya ang sunod nga suspensuhon human ni Makati City Mayor Junjun Binay, nipadayag na og pagsalig si Rama nga ma-absuwelto siya sa kasong administratiba tungod sa ilang pagpanawat og calamity assistance niadtong Disyembre 2013 bisan di sila mga biktima sa katalagman.
Gawas nga niinsistir nga naigo sab siya sa linog ug bagyong Yolanda, gihinumdoman ni Rama nga P10,000 nga bonus ra untay gusto niyang ihatag sa matag opisyal ug kawani sa City Hall. Gipasanginlan niya ang mga sakop sa City Council nga maoy nipaburot sa bonus ngadto sa P20,000 ug gitawag na og calamity assistance.
* * *
Masaligon sab si Rama nga mabasura ang tanang kaso nga gipasaka batok niya ug sa department heads kun tarungon lang gyud pagtimbang-timbang sa mga hukmanan ang mga ebidensiya. Nipasalig siya nga sukwahi sa pasangil sa iyang mga kaatbang gitun-an ug gimatngonan ang tanang transaksiyon nga gisudlan sa iyang pamunoan.
Gihangop sang Rama ang pag-absuwelto ni Ombudsman Conchita Carpio-Morales niya sa kaso mahitungod sa usa sa mga proyekto sa South Road Properties (SRP) niadtong 2013. Subling nipadayag og pagsalig si Rama sa katakos nilang Morales ug ubang mga abogado sa Ombudsman pagsusi nga pulos pamolitika ug pagpanggukod ang mga kaso nga gipasaka ni kanhi mayor Tommy Osmeña batok sa iyang pamunoan.
- Latest
