Spoiled nga senior citizens

Ambot og matawag ba nato nga abuso ang gihimo sa pipila ka senior citizens dinhi sa dakbayan sa Sugbo nga nagsige og apura ni Mayor Mike Rama sa pagpagawas na sa ilang tabang-salapi alang sa unang tulo ka buwan karong tuiga.

Ang mga senior citizens dinhi sa dakbayan gihatagan na og pasiuna nga P1,000 nga cash assistance sa wala pa ang Valentines Day. Ang maong kantidad gidungan paghatag sa nahabiling P2,000 nga kuwang sa tabang-salapi sa miagi’ng tuig.

Karon ang mga senior citizen nagsige na usab og paningil ni Mayor Rama sa ilang tabang-salapi nga daw sama sa utangan ang dakbayan sa Sugbo kanila. Ang uban nga mga senior citizens namasangil na gani sa mayor nga milisud-lisod kanila.

Pagkasubo nga palandungon nga sa kaayo sa dakbayan sa Sugbo ngadto sa mga senior citizens, aduna gihapo’y nagreklamo ug wala makasabot sa sitwasyon sa dakbayan.

Nagtuo tingali ang ubang senior citizens nga namunit lang og salapi ang dakbayan sa Sugbo aron itabang kanila.

Basin wala masayod ang mga nagreklamo nga senior citizens nga puwerte na nila’ng daghana.

Kun kaniadto ang dakbayan sa Sugbo duna la’y 25,000 ka senior citizens nga gihatagan og tag P2 mil nga tabang-salapi matag tuig, karon miabot na sa 60,000 ang ilang gidaghanon.

Gawas nga midaghan na pag-ayo, ‘tag P12 mil na ‘sab ang ihatag kanila matag tuig. Kun ang dakbayan nagkinahanglan lang kaniadto og P50 mil para sa tabang salapi karon nanginahanglan na og P720 milyones.

Dili sayon pangitaon kini’ng mao nga salapi busa pagpaabot mo ug ayaw pagbagulbol.