Suporta ko Mayor Cortes

Nindot ni ang lakang ni Mandaue City Mayor Jonas Cortes nga sa dili pa ipanghatag ang binuwan nga allowance sa mga polis nga gikan sa dakbayan, pakuhaan usa og drug test ang mga polis aron masuta kun kinsa kanila ang adik.

Angay kini nga sundogon sa ubang local government units (LGU) sama sa dakbayan sa Sugbo kay pinaagi niini mahibaw-an kun kinsa sa mga polis ang mogamit usab diay og drugas.

Kadto’ng dili magpa-drug test, walay mahimo si Cortes aron sila pugson apan may katungod ang mayor nga momando nga dili ihatag sa mao nga mga polis ang ilang binuwan nga allowance.

Unya, kun dili pa g’yud gihapon magpa-drug test ang mao nga mga polis, ipalabay sila ngadto sa lain nga mga lugar. Ubos sa lagda sa Republic Act 8551, ang mga mayor gihatagan og gahum kabahin niini.

Ang nakaapan lang kay daghan pa intawon nga mga mayor nga dili makamao mogamit sa gahum nga gihatag kanila base sa Section 62 sa Republic Act 8551.

Angay g’yud nga moabag ang mga opisyal sa mga lokal nga kagamhanan sa kampanya ni DILG Secretary Mar Roxas nga taktakon sa serbisyo ang mga badlongon nga polis.

Sa usa ka pamahayag ni Mar Roxas atubangan sa kapolisan didto sa kaulohan, gitataw gayud niya nga angay’ng palagputon sa serbisyo ang mga polis nga naghatag lang og buling sa kadungganan sa PNP.

Nindot unta kun si Mayor Rama mohimo usab niini. Apan ambot, mohimo ba kaha si Mayor Rama niini nga basta maglambigit gani og kuwarta moingon man dayon nga dili niya gusto nga ibanan ang income sa mga polis.

Sa akong bahin, dili ko mopabor sa argumento ni Mayor Rama. Suportahan nako ang estrikto nga paagi kay pinaagi niini, magmatngon ang mga polis.

Diha nga ang tsirman sa Police Coordinating and Advisory Council (PCAC) mao pa si Vice Mayor Renato Osmeña, unya ang pangulo sa Committee on Police mao si Konsehal Rogelio “Jingjing” Osmeña (mga pareho nga patay na), mahadlok ang mga polis nga moabuso.

Kaniadto kun makit-an ang mga polis dinhi sa dakbayan nga magmotor nga dili mosul-ob og crash helmet, putlan dayon sa ilang City Hall allowance.

Kadto maoy lakip lang sa mga silot nga ipahamtang sa mga badlongon nga polis. Mao kadto nga ang mga polis niadto, mahadlok nga magpabadlong, dili pareho karon.

Angay nga suportahan gayud ang estrikto nga kampanya batok sa mga badlongong polis aron nga sila respitohan sa katawhan.