Pakisusi sa mga hikog

Dili maayo kining tilimad-on mahitungod sa mga insidente sa hikog dinhi sa lalawigan sa Sugbo. Kini ilabina nga daghan sa mga nalambigit puro mga batan-ong estudyante.

Didto sa lungsod sa Daanbantayan, daghan ang nakurat sa  dihang usa ka estudyante sa high school ang naghikog gumikan kay wala kuno maaprobahi sa iyang maestra ang iyang clearance.

Apan human sa maong hitabo, wala usab damha nga iyang ig-agaw ang mosunod diay pagkutlo sa iyang kinabuhi. Matud sa taho nga ang kakulang usab sa clearance maoy nagtukmod sa maong batan-on sa paghikog.

Samtang didto sa dakbayan sa Lapu-Lapu, mikutlo usab sa iyang kinabuhi ang usa ka graduating student sa elementarya human kini gikasab-an sa iyang inahan kay gusto kuno nga molayas gikan sa ilang panimalay.

Makatingala tuod kining maong mga insidente. Kini tungod kay morag yano lamang karong panahona alang sa ubang batan-on ang pagkutlo sa ilang kinabuhi.

Unsa kahay eksplinasyon sa mga psychologists ug ubang eksperto mahitungod niini. Angay lamang siguro nga maedukar ang katawhan kun unsa gayud ang hinungdan niining maong mga insidente sa paghikog.

Siguro ang dakong pressure nga dala sa kahago sa pagtuon ang adunay kalabotan niini. Dili nato ikalimod nga adunay mga tinun-an nga dali lamang nga maluro sa kalisod sa mga subject sa ilang tunghaan.

Kini ilabina sa paspas nga dagan sa moderno tang kinabuhi. Ug tungod lagi sa kadaghang gimbuhaton, dili na gayud makaya pa sa uban, ilabina sa kabatan-onan karon, ang pressure.

Bisan pa man sa pag-abot sa bag-ong mga teknolohiya nga nagpagaan sa atong mga lihok, midako usab ang pressure alang sa paghuman sa inadlaw nga gimbuhaton. Kini  usahay ang rason ngano nga daghan ang mosurender, ilabina niadtong huyang sa paminsar.

Angay lamang nga mohimo og makuti nga pakisusi ang otoridad sa sirkumstansiya sa mga insidente sa paghikog sa maong mga batan-on. Daghang pangutana ang maong mga insidente nga nagkinahanglan og dinaliang tubag, ilabina mahitungod sa psychological nga isyu.