Asawa supak sa pagbaligya

Dear Atty. Divine,

Adunay property nga gihatag ang akong amahan sa diha’ng bag-o pa akong minyo. Ang maong property nakapangalan na namo’ng magtiayon. Karong bag-o, adunay kompaniya nga gusto’ng mopalit niini ug nagkauyon na unta kami. Apan ang akong asawa misupak ug dili siya mopirma sa Deed of Absolute Sale kay wala siya makauyon sa presyo. Ang akong pangutana, duna ba ako’y absolute right sa maong property considering nga hinatag kini sa akong amahan? Maapil ba isip conjugal ang property bisan kun kini naggikan sa imong mga ginikanan? - Tito

Dear Tito,

Kun ang maong property gidonar sa imong amahan kanimo lang ug wala niya giapil ang imong asawa sa iyang Deed of Donation, then ikaw lang ang adunay katungod niini apan kun kini gihatag kaninyo nga magtiayon, makonsiderar kini nga inyong duha. Apan base sa imong suwat nga kini nakapangalan kaninyo’ng duha nga magtiayon. Buot ipasabot nga kamo’ng duha ang adunay katungod ug kinahanglan g’yud ang consent sa imong asawa kun imo kining ibaligya. Mas maayo nga hangyuon nalang nimo siya kun gusto g’yud nimo nga ibaligya ang maong  property. Kalabot sa mga property nga masunod nimo gikan sa imong mga ginikanan, base sa balaod, makonsiderar kini nga exclusive property buot ipasabot nga dili kini conjugal ug wala’y labot ang imong kapikas sa bisan unsa’ng property nga imong ma-inherit gikan sa imong mga ginikanan. - Atty. Divine

Alang sa inyong pangutana ipadala lang sa Legal Corner sa Banat News sa V. Gullas St.,Cebu City or email sa [email protected] ug akong tubagon ang inyong pangutana pinaagi sa akong column  matag Miyerkules ug Domingo.