Bawog ug barug
Suheto kaayo ko sa kinaiya o kinabuhi ning suod kong higala. Sukad nga batan-on pa, siko ug strikto kaayo ang pagkatawo niini. Strikto sa iyang gituhoang baruganan. Lisud matarog o di mohatag o maminaw sa opinyon o tambag sa uban. Dili ba, tawo man kita nga dili gyud makaperpekto sa tanan?
Edaran na kaayo ni mga 76 anyos na, swerte makaabot ta ining edara, unya wa pa gyuy gipamati sa panglawas. Lantip gihapon ang panghunahuna, kay daan na ni siyang utokan ug may pagkahenyo. Suheto sa tanang butang, maong di gyud matarog sa iyang baruganan. Apan sa panglawas, wa gyuy hanaw nga mapagarbohon kaayo sa kalig-on sa iyang lawas nga way sakit.
Ang tipo sa dugo niya nga AB nga nihit og dugo ning klaseha, nakatabang sa iyang kahimsog kay natural ning dunay lig-on og 'auto-immune'. Mahimong makalingkawas siya sa mga sakit nga 'chronic' apan di siya kalikay sa 'acute diseases' nga sagad kalit atakehon ang bukog nga magabok o mamahuyang ang prodaksyon sa mga bag-ong selyula sa uyok sa bukog (bone marrow).
Dugay ko na siya gitambagan apan gebalewala lang. Karon sugod nag bawog ang tuyhad niyang barog. Siya na gyuy niingon, nga mora’g husto ko. Kay sugod na nanakit ang hawak, tandugon nga manakit ang likod (spinal column). Unsaon kompiyansang grabe mokaon, inasal gud hurot bisag 2ka kilo pa. Ang iyang barug ron inanay nang nibawog nga nag-agayay sa kasakit.
Apan may usa lang nga nakaapan, wala gyud mabawog ang kinaiya ug baruganan nga siyay husto permi, nga di maminaw sa anak. Matinumanon nga gahi’g ulo, aron unta siya atimanon. Dili gyud moipon sa mga anak, kay giisip niyang mahimo siyang ulipon nila, maong gipalabi, nag-antos nga nag-inusara.
- Latest