EDITORYAL - Hagit sa Climate Change

Climate change, usa ka dakong hagit sa tanan dili lang sa mga gobiyerno sa kanasuran kondili apil na sa yanong mga tawo. Mao kini ang pag-usab sa klima sa kalibotan nga epekto sa kainit nga wala makahungaw mugna sa baga na kaayong polusyon sa kalangitan. Tinuod nga sa matag paglambo adunay masakripisyo, sama na lang sa paghimo sa mga dagkong siyudad, kun kaniadto patag kini nga kalasangan karon patag na nga kalasangan sa bato nga hinimo sa tawo ug nahimo usab nga modernong komunidad.

Sama dinhi sa Cebu City, daghan nang mga gagmay nga natural nga sapa ang nangatabunan sa mga gipangtukod nga mga buildings. Nangauga na man kuno kining mga sapa, samtang ang  uban tuyo na lang g’yud nga gitabunan og anapog aron tukoran og edipisyo.

Nangauga ang mga sapa tungod kay giupawan na man ang kalasangan sa bukid  kay gigamit man sa tawo ang mga kahoy sa paghimo sa mga estraktura ug pangsugnod nga iyang gikinahanglan.

Sa habig sa enerhiya, dakong porsiyento sa tinubdan sa enerhiya sa kuryente dinhi sa Pilipinas nagsalig gikan sa fossil fuels,  mao kini ang mga planta nga gipadagan pinaagi sa petrolyo.

Samtang mao usab ang mga sakyanan nga gigamit nga transportasyon,  gipadagan usab kini og petrolyo nga pulos nagbuga og makadaot nga carbon dioxide sa kahanginan ug nahimong kontribyutor sa polusyon.

Ang enerhiya sa kuryente mahimong makuha pinaagi  sa renewable energy sources sama sa solar power, hydropower, geothermal power, wind farms ug uban pa.  Mao usab ang sa transportasyon, daghan pa kaayong wa pa madiskubrehing mapuslan sa tawo nga alternatibo sa fossil fuels.

Ang kuwang lamang g’yud mao ang sensiro nga pagtuman sa mga balaod alang sa pag-atiman sa kalikopan ug mga alternatibong pamaagi nga dili kinahanglang gubaon ang kainaiyahan aron lang makakuha og enerhiya.