EDITORYAL - People Power?

Bugnaw nga pagtagad sa katawhan ang naobserbahan sa ika-29 nga anibersaryo sa EDSA People Power Revolution niadtong nakalabay nga adlaw’ng Miyerkules, Pebrero 25.

Dako ra kaayo kini og kalainan sa nangaging mga katuigan human sa makasaysayanong EDSA People Power Revolution niadtong 1986 diin nagmadaogon ang demokrasya batok sa diktadoriya ni kanhi presidente Ferdinand E. Marcos.

Matud pa sa mga report gikan sa Manila, mas daghan pa ang mga polis ug kasundalohan nga nanambong itandi sa sibilyan. Misinta pa ang mga militante kay mas daghan pa ang mga polis nga nagbarikada itandi kanila.

Usa ray gipasabot niini, gipangkapoy na ang mga tawo sa pagsige og martsa nga ang nabulahan kadto lang mga lider-lider. Ikaduha, dili sila makakaon o makapaeskuyla sa ilang mga anak pinaagi sa pag-martsa ug uban pa.

Dili kini maingon niini kun wa pa abusohi sa mga tawong impluwensyado, adunahan ug mga grupo nga dunay kaugalingong interes sa politika ug sa negosyo. Nabarato  na ang pulong “People Power” kay matag dili sila ganahan sa namunoan, mag-people power dayon.

Puol na kaayong paminawon kay dunay EDSA Uno, EDSA Dos ug EDSA Tres. Sama sa usa ka putahe sa pagkaon kun mao ray balik-balikon sum-ol na kaayo. Di lang ang Pebrero 25 maoy ilang ampay magprotesta,  hasta usab  sa ubang national events sama sa Independence Day, Labor Day,  Bonifacio ug Rizal Days.

Wa nila hunahunaa nga kining maong mga adlawa gitiman-an dili lamang para kanila, kondili, alang kini sa mosunod nga henerasyon.

Kinahanglan mahibaw-an sa kabataan ang kamahinungdanon sa maong mga adlaw ug dili ang adlaw nga diin nakita nilang nagkagubot tungod sa rallies. Mas maayo siguro nga maghimo og balaod aron pasilotan kadtong maghimo og mga kalihokang politikal nga way labot sa diwa sa selebrasyon.