Brgy gen. Climaco, toledo city

 “Magpatabang unta mi sa among covered court nga maablihan na kay kami’ng mga batan-on dili na man makaduwa’g basketball. Gipasirad-an man gud ni sa usa ka konsehal maong wala na magamit sa mga tawo diri.”

Brgy Tisa, Cebu City

“Patabang lang unta mi kay kini’ng among silingan diri sa Mohon 1 naay negosyo nga computer, saba kaayo kada gabii maglisod mi’g katulog. Maayo unta’g mabadlong ni kay kasagaran ra ba sa mga moduwa mga bata.”

Brgy Tejero, Cebu City

“Naay garbage truck diri sa barangay dili na man manguha sa basura daghan na kaayo ang nagpundok unya baho ra ba kaayo labi na diri sa Sitio Lantay. Hangyo lang mi sa pagpaabot niini’ng among problema sa mga opisyal sa barangay.”

Brgy Malalay, Ronda, Cebu

“Hangyo lang mi sa mga polis diri sa Ronda nga mohimo’g aksyon diri sa among lugar kay daghan na man nagdala-dala og armas bisa’g sibilyan unya ipakita pa g’yud nila. Kuyawan mi diri kay daghan na baya ang nahitabo’ng pusil diri nga wa masulbad.”

Brgy Babag, Lapu-Lapu City

“Tabangi intawon mi diri sa Sitio Radar Sir kay karsada diri pwerte na gyung batia dugay na kaayo ning problemaha pero hangtod karon pabilin ning giatos namo diri. Taga diri ra man unta dapit among kapitan pero wala ma  gyu’y aksyon.”

Brgy Calawisan, Lapu-Lapu City

“Mangutana lang mi kun husto ba kini’ng gibuhat sa among opisyal diri nga paabangan man ang tent ug mga bangko nga hinatag sa siyudad apil ang parking area sa barangay hall ila ‘sab pabayron ang moparking.”

Brgy Catmondaan, Catmon, Cebu

“Grabe na man ang pagpanguha’g bas ug mga bato diri sa among lugar uy, bati na kaayo tan-awon ang baybayon unya ilegal man unta ni pero wala man g’yuy aksyon ang among mga opisyal nga kahibalo man unta sila.”

Brgy Basak, Lapu-Lapu City

“Palihug intawon mi’g pasusi diri sa Pakpakan dapit kay nagtipun-og na man ang mga basura. Kapila na ni namo gireklamo sa barangay kapitan pero wala man gihapo’y aksyon nga gihimo. Naa na ra ba’y nagkasakit diri nga lumolupyo kay sige’g kasingo sa baho sa basura.”

Brgy Basak, Mandaue City

“Pait kaayo diri sa among dapit sa Sitio Kanipaan kay naay mga bata diri nga kusog manuyop og gasolina sa mga magparking nga sakyanan. Mahibulong na lang mi nga ini’g ka buntag dili na moandar ang among sakyanan. Maayo unta’g naay mag-roving nga mga tanod matag gabii diri sa among lugar.”