Pamolitika sa Senate probe

Maayo tingaleng moundang na lang si Sen. Nancy Binay sa pag-apil-apil sa Senate inquiry kalabot sa Mamasapano encounter nga mikalas og 44 ka Special Action Force commandos, kun dili siya makapugong sa iyang kaugalingon pagsagol og pamolitika sa imbestigasyon. Human niya kini gihimo, apan iya pa gyud kining gisundan karong bag-o.

Human na mogawas sa nangaging mga Senate inquiry nga si Interior Secretary Mar Roxas gi-blind ni Alan Purisima, ang suspendidong PNP chief nga maoy nangunay pagsuperbisar sa operasyon sa Mamasapano, tungod kay gusto nilang solohon ang unsa man nga reward gikan sa Amerika.

Aduna pa unta’y daghang mga “material matters” nga angay mahibaw-an sa mga Pilipino kalabot sa insidente sa Mamasapano, apan si Nancy Binay anaa ra gyud nagtuyoktuyok sa iyang pangutana pagduot kang Roxas, ngano kunong wala niya pahibaw-a si Presidente Noynoy Aquino sa mga nanghitabo sa engkuwentro.

Didto na mipaklaro si Roxas sa iyang pagpasabot sa interbiyu sa mga media sa kauluhan. Matud niya nga sa pagka-alas 3 na sa hapon sa dihang nahibalo na siya sa mga nanghitabo sa Mamasapano, iyang gipahibalo si Aquino nga 27 na ang nakalas sa dihang ang mga SAF commandos gipang-atake na sa mga sakop sa Moro Islamic Liberation Front ug Bangsamoro Islamic Freedom Fighters.

Gihilasan pa ang mga “netizens” sa paukyab ni Nancy Binay pinaagi sa pag-ingon ngadto kang Roxas: “you are under oath” mao nga kinahanglan siyang magsulti sa tinuod. Apan ning mga panahona, wala pa koy nadunggang balita nga si Roxas adunay bakak. Sumala pa sa mga netizens ang pamilya hinuong Binay nagpabilin ang imahe sa pagkabakakon taliwala sa wala nila pag-atubang sa Senate inquiry sa mga kabtangan ug pasangil nga korupsiyon sa Makati.

Kung dili makapadaplin si Nancy Binay sa pamolitika (kay ang iyang amahan nga si Bise Presidente Jejomar Binay ug si Mar Roxas man ang gipaabot nga magsakbang sa 2016 presidential elections), maayong mo-inhibit lang una siya sa Senate inquiry sa Mamasapano. Hinuon, wala man gyud siya’y maayong kontribusyon sa imbestigasyon.

Ang mga pangutana ni Nancy Binay nagtuyoktuyok ug  nagsentro lamang sa pagduot sa usa ka tawo, dili sama nilang mga Senador Bongbong Marcos, Allan Peter Cayetano ug Grace Poe nga motumbok sa kamatuoran ang ilang mga pangutana ug rebelasyon. Maayo pa si kanhi Davao Mayor Rodrigo Duterte kay walay likoliko sa iyang mga baruganan sa Mamasapano. Wala usab siya magpaka-aron-ingnon sa iyang mga tubag, dala ang pagpahibalo sa mga Pilipino nga may plano siya nga modagan pagka-presidente sa 2016.

Kun maklaro lang ni Digong iyang plataporma, hayan adunay daghang mopaluyo kaniya.