Ang maayo og abilidad

Bag-o pa si Gally sa ‘radio station’ nga iyang gialagaran isip ‘scriptwriter’. Gradwado siya sa England, sa kurso nga ‘Creative Writing’. Nalakip sa iyang pagtuon ang paborito niyang ‘scriptwriting for movie, radio & television’.

Halos tanang mga programa niya, pulos nag-una sa surbi. Busa gihatagan siyag daghan pang programa, sa ‘Creative Consultant’. Apan luyo ning tanan, hilom nga nasina ang nag-una pa niyang kauban sa trabaho. Makamao man sad sila apan lahi kang Gally nga adunay maayo og abilidad nga maantigo gyud.

Wa damha ni-resign ang ‘Creative Consultant’. Gipulihan nig kauban nilang dugay na sa estasyonan, nga kakonsabo sa mga masinahon. Mga malipayon nga nakapabor kay ila na sab ang panahon. Anam-anam nga gipanguhaan si Gally og programa nga talagsa na lang makatrabaho.  Wa makit-i ang abilidad niya. Sa mao nga sitwasyon, kanunay na nga wala mamuntos sa surbi. Permi ubos ang “rating” nila. Nakaabot kini sa management nga dismayado. Tungod niini, giplanong ilisan na usab ang ‘creative consultant’. Ug nadisisyonan nga si Gally ang ibutang sa maong posisyon. Apan wala na siya, tua na sa karibal nga estasyon nga kaniadto iwit permi sa surbi, apan karon nag-una  sa ‘rating’.

Usa ni ka leksyon, sa adunay katakos sa pagtrabaho nga wala lang hatagi og pagtagad. Anha na maila ang kabililhon niini kun makaamggo nga wala na.  Ang tawo nga tiunay nagmalasakit, maunongon ug masilakon, gumikan sa talento nga nagbaton og hiyas nga may maayong abilidad sa pangalagad.