Hustisya! Hustisya!

Mao kini ang gisinggit sa mga kabanay ug tagtungod sa 44 ka sakop sa PNP Special Action Force (SAF) nga napatay sa mga sakop sa Moro Islamic Liberation Front (MILF).

Apan unsa’ng matanga sa hustisya, pagpapriso sa mga mipatay kanila ug ni Director General Alan Purisima nga giingong maoy nagmando sa maong grupo pagpadakop sa Malaysian bomb expert nga si Sulkifli Bin Hir? Si Sulkifli alyas Marwan giingong sakop sa Jimaah Islamiyah.

Wala kaayo maklaro kun ang ilang gidemanda nga hustisya maglakip ba sa pagpalambigit sa kaso ni Presidente Aquino kinsa mao kuno’y mihatag og “go signal” sa pagpasikop ni Marwan?

Kini tingale’ng matanga sa hustisya maoy gipangita sa mga tagtungod sa mga mitaliwan nga polis.

Apan mahitabo kaha kini? Kana tingale kun imando sa gobiyerno nga ipahuwes de-kutsilyo ang mga MILF ug BIFF aron sila mangamatay o kaha madakpan ug mapriso.

Unsa kaha kun angkonon ni Purisima nga siya maoy nagmandar sa maong operasyon. Si Purisima suspendido sa katungdanan og unom ka buwan tungod sa kaso nga pagkalambigit sa pagpangawkaw.

Kun tinuod man ‘sab nga si PNoy maoy naghatag og “go signal” makuwestiyon ba diay nga siya man “commander-in-chief” sa nasud, ilabi na sa kadako sa iyang pagsalig sa abilidad ug katakus sa SAF?

Gihimo kadto nila kay basin og wala’y laing grupo nga kapiyalan ang kadagkoan sa kagamhanan sa pagsulong sa maong lugar nga gitudlo kanila sa espiya nga maoy nahimutangan ni Marwan.

Dili basta-basta ang SAF kay matag usa kanila adunay kapasidad nga makiggubat busa sila’y gitahasan sa maong misyon. Ang nakaapan lang kay gilupig sila sa kadaghan sa ilang kaaway.