EDITORYAL – Daghan og makaaway

Ang kanunay’ng presensya sa mga traffic personnel nga magsakay og patrol vehicle sigurado nga makapugong na sa mga motorista nga mopakusog pagpadagan kun moagi na sila diha sa SRP-South Coastal Road.

Dili na kinahanglan nga did-an pa ang mga motorsiklo nga moagi sa mao nga karsada ug labaw na nga dili tukma nga kini sirad-an sa mga sakyanan kay mahimo ra man kini nga kapangitaan og sulbad ang problema nga dili na moabot sa pagsirado sa highway.

Karon pa lang daan daghan na nga mga tawo nga motorsiklo lang intawon ang mga sakyanan nga nagbagulbol na ug wala makagusto sa nahuna-hunaan ni Mayor Michael Rama.

Husto ang baruganan ni LTO-7 Regional Director Arnel Tancinco nga kun dili na paagion ang mga motorsiklo diha sa SRP-South Coastal Road aron wala nay aksidente diha nga maglambigit og motor, asa man sila moagi? Adto sila magpunsisok sa Natalio Bacalso Avenue.

Dili imposible nga adto na usab didto mahitabo ang mas daghan pa nga aksidente nga maglambigit og mga motorsiklo. Sirad-an na ba usab nato unya ang Natalio Bacalso Avenue?

Kun ang mga motorista makakita nga adunay patrol vehicle nga magwardas-wardas sa SRP South Coastal Road, sigurado nga magmatngon ang mga drayber nga sila dili gukdon ug dakpon sa mga traffic enforcers.

Apan angay g’yud nga kun mag-estrikto si Mayor Rama, hitsasan niya og “speed gun” ang mga traffic enforcers nga idistino sa SRP.

Pananglit tinud-on ni Mayor Rama nga pasirad-an niya ang SRP-South Coastal Road, daghan kaayo ang masuko kaniya.