Makab-ot pa ba ang kalinaw?

Niining akong kolum karong adlawa, tugoti ako nga mopadayon sa akong diskusyon mahitungod sa padayon nga gubot didto sa Mindanao. Dako kaayo kini nga isyu nga makaapektar sa kaugmaon sa katawhang Pilipino.

Gani, usa sa mga rason ngano nga mitiurok pag-ayo ang imahe sa Pilipinas taliwala sa international community mao ang walay katapusan nga gubot didto sa Mindanao, ang lugar diin ako natawo ug nagdako.

Sayang tuod ang Mindanao, ang giingong yuta sa saad tungod sa kadato niini sa natural resources. Apan tungod kay pabiling nag-operate ang mga rebelde’ng Muslim ug komunista didto, kumon na ang pag-ulbo sa engkwentro tali sa mga sundalo sa kagamhanan ug mga rebelde.

Aduna tuoy mga lakang pagkab-ot sa kalinaw. Gani sulod sa pipila ka dekada na kining mga peace talks. Apan bisan pa man sa mga pinirmahay tali sa kagamhanan ug mga rebeldeng Muslim, wala gyuy kalinaw nga mikunsad sa Mindanao.

Ug gumikan kay walay maayong bunga kining mga negosasyon, daghan ang nagtuo nga dili na gayud makab-ot pa ang kalinaw sa Mindanao. Ug kining insidente sa pagmasaker sa 44 ka pulis didto sa Maguindanao gikahadlokan nga maoy modagkot na usab sa pabilo alang sa dugang kaguliyang.

Sa ako nang gikaingon, wala gayuy tsansa nga makab-ot pa ang kalinaw sa Mindanao samtang padayong nagtiner pa og armas kining mga rebeldeng Muslim. Usa lamang kini sa duha ka punto nga akong nakita nga nagpugong pagkunsad sa kalinaw sa maong rehiyon.

Dili ba useless kaayo ang paningkamot sa atong mga igsuong Muslim kinsa magsige og sing-al alang sa kalinaw apan sila mismo dili usab mohimo og extra nga lakang sama sa pagtahan sa ilang armas ngadto sa nasyonal nga gobiyerno aron wala nay engkwentro nga moulbo?  

Ang ikaduha nga punto nga akong ipadangat mao ang kakulang sa kahiusahan sa atong mga igsuong Muslim sa kampanya pagkab-ot sa kalinaw. Ngano’ng dili na man lamang sila maghiusa aron paghugpong usab sa ilang mga yangungo ngadto sa kagamhanan? 

Sa akong nakita, kining duha ka punto maoy nag-unang babag nganong lisod gayud nga mosakdap ang kalinaw sa Mindanao. Klarong ang problema anaa sa atong mga igsuong Muslim ug wala sa habig sa atong kagamhanan.