Ang pagkaon sa buntag

Importante kaayo ang pamahaw, nga inigmata sa buntag haw-ang ang  tiyan kay taas ang oras nga way sulod nga pagkaon. Sagad ang uban wa lang manumbaling niini.

Maoy gihimo nga mohigop la’g kape o gatas, dayog kawhat sa mga butang aron mopaingon na sa eskuwelahan o sa trabaho ug uban pang inadlaw nga gimbuhaton.

Hangtud mahangol nga magsige’g kaon-kaon.

Gikinahanglan nga mokaon gyud sa pamahaw, aron di  modako ang kaon mo sa mga mosunod nga oras sa tingkaon.

Kay kun sugdan mo kini og way pamahaw, ang imong adlaw, permi ka lang bation og gutom, bisa’g magsige ka pag kaon matag oras. Ang resulta, motambok ka hinuon nga maluyahon.

Inigmata sa buntag, mga 30mins-1ka oras, molingkod ka na sa kan-anan aron sa pagpamahaw og pipila ka tinapay o sandwich nga may itlog, o ham o peanut ug gatas o kape.

O kaha, 1-2 ka tasa sa kan-ong humay o mais nga paresan og utan o isda ug prutas. Di kay postura lay atimanon dayo’g lakaw.

Aron di ka magkarakara nga malimtan na lang ang pamahaw, ihan-ay nga may skedyul kang oras sa pagmata. Mag-ehersisyo pero sudli una’g gamay ang tiyan. 30 mins. huma’g ehersisyo puwede na pormal sa lamesa mamahaw.

Mga 30mins-1ka oras, aktibo nang mobaskog ang lawas sa mga gimbuhaton mo.

Ayaw gayud ebalewala ang pagkaon sa buntag, kay kini ang maghatag kanato og maayong kondisyon sa panglawas ug pangutok sa tibuok adlaw.