Paghipos sa mga kabos
Ang pagkabisto sa pagtago sa nasudnong gobiyerno sa kabataan ug mga ginikanan sa kadalanan sa Metro Manila atol sa lima ka adlaw nga pagduaw ni Pope Francis, nakapahinumdom sa mga Sugbuanon sa karaang paagi sa pagpangandam sa Piyesta Senyor. Way lipudlipod nga gipahibawo sa kadagkoan sa kapolisan kaniadto nga ilang gisikop ang banggiitang mga kawatan, mangunguot ug mangingilad ug gitanggong sa isla sa Kawit hangtod sa liwas sa Sinulog.
Niinsistir ang beteranong mga opisyal sa kapolisan nga dako og natabang ang Kawit sa pagbuwag sa suspetsadong mga kriminal aron nga di makapanghilabot sa minilyon ka deboto ni Sr. Sto. Niño gikan sa Sugbo, ubang mga lalawigan ug ubang kanasuran.
* * *
Way seryusong pakisusi nga gihimo unsa katinuod ang pagtanggong sa Kawit sa mga suki sa kapolisan matag Sinulog. Wa say sibaw nga reklamo kay way andam nga molalis sa agresibong mga lakang pagpanalipod sa mga Sugbuanon ug sa ilang mga bisita sa Piyesta Senyor.
Nikumpisal ang bag-ong liderato sa kapolisan nga wa na ni nila himoa karon. Kay gawas nga naipon na sa mainland ang isla sa Kawit human natukod ang South Road Properties (SRP), mas agresibo na sang nipasidaan ug nanggukod ang Commission on Human Rights (CHR) sa mga polis nga way kalainan sa mga kriminal nga ilang gigukod.
* * *
Nahimo ang samang binuang dihang gipahigayon dinhi ang Asean Summit niadtong 2007. Mga tigpasiugda way kukauwaw nga nanghatag og mabulukon nga mga pintal aron mas nindot tan-awon ang buslot ug tayaon nga atop sa mga barungbarong ilawom sa Marcelo Fernan Bridge, nga maoy giagian sa mga presidente ug primero ministro sa kanasuran gikan ug padung sa nagkalainlaing venues sa summit.
Gipanghakot sab sa lokal nga mga opisyal ang mga nalisoan og pangisip gikan sa kadalanan sa Metro Cebu ngadto sa bukirang mga barangay ug hilit nga kalungsoran. Hangtod karon ang pipila sa mga biktima naglaruylaroy pa sa lalawigan, wa nang katultol sa ilang gigikanan.
* * *
Kinahanglang pamatud-an ni Social Welfare Secretary Dinky Soliman, kun mahinayon pag-atubang sa imbestigasyon sa Kongreso, nga kapin na sa 2,000 ka pamilya ang nakapahimus sa programa sa niaging duha ka tuig, o sa wa pa matakda ang pagduaw sa Santo Papa.
May sukaranan hinuon ang pagmahay sa mga Sugbuanon ug ubang mga molupyo sa Kabisay-an ug Mindanao: Nganong Metro Manila ra may gipatilaw sa programa? Nganong wa may bisan usa ka pamilya sa kadalanan dinhi sa ato nga nakatilaw sa dugay na diay’ng proyekto sa Pantawid Pamilyang Pilipino Program (4Ps) nga gipapuyo ug gipakaon og luho nga beach resort ug gitudloan pag-ila-ila sa ilang kaugalingon, unsay responsibilidad sa mga ginikanan, unsay kalainan sa lalaki ug babaye ug unsaon pagkat-on pagpuyo og disenteng pinuy-anan?
- Latest
