Santo papa mobalik

Ambot ngano g’yud nga adunay mga tawo nga sakop og lain nga reliheyon nga kusog kaayo modaut sa tinuohan nga Katoliko. Paghimo lang kamo sa inyo’ng mga plano pagdani og dugang sakop,a pan ayaw pangdaut.

Kadto’ng usa ka babaye nga puwerte’ng nakadaut ni Pope Francis atol sa pag-anhi sa Santo Papa sa Pilipinas sa miagi’ng semana, klaro kaayo kun asa nga reliheyon nga nasakop.

Mao kini ang reliheyon nga ang mga sakop kusog kaayo mangaway. Ambot, nagtuo tingali sila nga ang mga sakop sa ilang reliheyon mao ra ang maluwas inigkatapos sa kalibutan.

Dili na lang nako ibutyag kun giunsa pagdaut sa mao nga babaye ang pangulo sa tinuohang Katoliko. Dili usab nako ibutyag ang iyang ngalan kay basin ang iyang tumong nga aron siya mosikat.

Ang gihimo sa mao nga sakop sa laing reliheyon nagmatuod lang nga aduna g’yuy mga tawo nga nagtinguha og kadautan ni Pope Francis sa pagbisita niya sa atong nasud.

Tukma ra g’yud ang gihimo ni DILG Secretary Mar Roxas nga mipakatap og hilabihan kadaghan nga polis sa mga dapit nga giagian sa Santo Papa aron masiguro ang iyang kaluwasan.

Angay g’yud diay nga pasidunggan si Roxas ug ang tibuok puwersa sa kapolisan sa ilang malampuson nga pagproteher ni Santo Papa samtang dinhi kini sa atong nasud.

Sayonan ka nga kun may mahitabo sa Santo Papa dinhi sa Pilipinas, pagkadako’ng kauwawan nga wala nato siya mapanalipdi.

Sigurado ko nga may mga tawo g’yud sa sakop sa laing reliheyon nga nagpangagot ang bag-ang nga nagtan-aw sa hilabihan kadaghang mga Katoliko nga misugat ni Pope Francis.

Sa gipakita’ng paghangop sa mga Filipino kang Santo Papa atol sa iyang pagbisita dinhi, sigurado ko nga dako ang posibilidad nga mobalik si Pope Francis atol sa pagpahigayon sa International Eucharistic Congress karong sunod tuig. Kun anaa pa si Roxas sa DILG, sigurado ko nga luwas kaayo ang Santo Papa dinhi sa atong nasud, ug niana’ng higayona posible nga si Pope Francis moanhi na sa Sugbo.

Madayon gani nga moanhi si Pope Francis atol sa International Eucharistic Congress sunod tuig, kamo nga mga sakop sa reliheyon nga kusog kaayo mangdaut, padaplin lang.

Ayaw na buhata pag-usab nga gimantala nimo sa Facebook ang imong pagdaut sa lider sa labing dako nga reliheyon sa kalibutan kay basin og dunay makabasa og makaila nimo, basin og unsay maabot sa ilang huna-huna.

Ulahi na unya ang pagbasol.