Trabaho sa mga senior citizens

Angay pa ba nga magpalabang ang konseho sa dakbayan sa Sugbo og balaudnon nga nag-required sa mga business establishments ning siyudad pag-hire niadtong mga senior citizen kinsa gusto pa nga motrabaho?   

Hinuon dili na ikatingala pa ang suporta sa Office of the Senior Citizens Affairs (OSCA) niini. Kini tungod kay daghan sa mga senior citizens niining dakbayan ang dunay kapabilidad pa nga mangempleyo bisan pa man sa ilang mga edad.

Insakto usab si OSCA chief Dominggo Chavez kinsa dako pa og pagsalig sa atong katigulangan. Matud pa ni Chavez nga daghan pa’ng mga katigulangan sa dakbayan ang adunay pisikal ug mental nga kapabilidad sama sa mga batan-on pagtrabaho.

Apan mirebenta usab ang sektor sa pamatigayon batok sa proposed ordinance. Adunay isyu sa maong ordinansa ang wala mauyoni sa kahugpongan sa hotel, resort ug restaurant sa Sugbo tungod kay wala kuno kini klaro.

Matud pa nga dili kuno komportable ang maong grupo sa linya sa maong ordinansa “pag-require” sa mga establisemento pagdawat sa mga senior citizens kinsa gusto motrabaho. Dili kuno kini insakto tungod kay mas angay kuno ang “pag-encourage” lamang sa mga establisemento pag-hire sa mga katigulangan.

Insakto usab ang maong kahugpongan. Ang ilang punto mao nga dili unta sila angay nga obligahon pagdawat sa mga senior citizens. Hinuon dili gayud kalikayan nga adunay daghang mga negosyante ang mopiyait batok niining maong ordinansa. Ambot unsa kahay sampotanan niining maong balaudnon. Karon pa lamang, morag daghan na ang nagkwestiyon niini. Apan tungod sa dakong inpluwensiya sa atong katigulangan, dako’g tsansa nga mapasar kini.

Apan unsa ba gayud ang kaimportante sa maong ordinansa?

Hinuon aduna na kitay nasyonal nga balaudnon mahitungod niini. Ang Section 5 sa Republic Act 9994 nag-ingon nga obligasyon sa estado ang paghatag og trabaho niadtong mga senior citizens nga aduna pay kapabilidad ug desire nga makatrabaho.

Angay lamang nga tarungon sa kagamhanan sa dakbayan ang paghulma sa maong balaudnon. Maayo ang intensiyon niini nga naghatag og kapanginabuhian sa atong katigulangan. Apan hinaut nga dili usab maagrabyado ang sektor sa mga magpapatigayon.