EDITORYAL - 93% ang malaumon

Nobenta’y tres porsiyento sa 1,800 ka mga Filipino nga gipaubos sa survey sa Social Weather Stations ang malaumon nga mas maayo ang kabutang sa ilang kinabuhi unya sa tuig 2015.

Kapin sa singkwenta porsiyento (900) sa gi-survey namuyo sa Visayas samtang ang uban gikan sa Metro Manila, Luzon ug Mindanao nga dunay sampling error margins nga ±2.3% sa national percentages, ±5.7%  matag usa sa Metro Manila, Balance Luzon ug Mindanao, ±3.3% usab sa Visayas.

Ang pangutana sa survey nagpokus bahin sa “paglaom kontra kahadlok” ug migawas nga mas daghan sa mga Filipino ang positibo og panglantaw sa ilang kinabuhi sa tuig 2015 inay nga mahadlok. Gihimo ang survey Nobiyembre 27 kutob Disyembre 1.

Ang tuig 2014 mao ang tuig sa mga Filipino nga namudyot kini ug nagsugod sa uno ang uban tungod sa nangaging katalagman sa tuig 2013 (7.2 magnitude nga linog sa Kabisay-an ug super typhoon Yolanda).

Apan ang panglantaw sa mga Filipino sa 2014 mas taas kini itandi sa 2015 tungod kay human sa duha ka katalagman sa 2013,  ang SWS survey nagpakita nga 94  porsiyento sa mga Filipino nga taas kaayo og pangagpas nga sila makabangon.

Ang mga Filipino nabantog na sa pagkalig-on niini bisan sa unsang matang sa krisis, katalagman, politika  o ekonomikanhon. Apan wala kini maingon niini kun ang gobiyerno kaniadto pa mihimo sa ilang trabaho sama sa pagtabang sa mga biktima. Kinaiya na sa tawo nga maninguhang mabuhi ug makalingkawas sa bisan unsang paagi.  Naanad na ang katawhang Filipino nga bisan sa dyutay kaayong mapaabot gikan sa gobiyerno, nakat-on na kining di magsalig tungod kay basin mamatay lang sila sa pagpinaabot.

Ang pagkamika sa gobiyerno maoy usa sa rason kun nganong “resilient” ang mga Filipino, mahimong nindot kining paminawong kinaiya sa mga Filipino apan bati gihapong pamalandungon.