13th month pay gikaltas sa suweldo

Dear Atty. Divine,

Usa ko ka guard nga nagtrabaho sulod sa lima na ka tuig. Ang among agency moiban og ‘tag P300 sa among suweldo kay para kuno sa among 13th month pay. Naglibog ko attorney kun asa man diay kuhaon ang 13th month pay? Sa amo ba nga suweldo o ang agency ang mohatag namo niini? Kun sayop ang ilang gibuhat attorney unsa may maayo namo nga buhaton? Daghang salamat sa imong pagtagad sa among problema. - Roland

Dear Roland,

Base sa Presidential Decree No. 851 kon 13th Month Pay Law, kini nagmando nga ang mga kompaniya o employer mohatag g’yud niining maong benepisyo sa ilang empleyado nga katumbas sa usa ka buwan niya nga suweldo kun siya nakatrabaho na sa maong kompaniya sud sa usa ka tuig. Kun less than a year lang nga nagtrabaho ang maong empleyado duna kini computation. Sa ato pa, klaro kaayo sa maong balaod nga ang employer maoy mohatag sa 13th month pay ug dili kini ikaltas sa inyo’ng sweldo nga gidawat. Ang maayo nimong buhaton karon mao ang pagreklamo niini sa inyong agency. Kun pananglitan dili g’yud sila mohimo og aksyon mas maayo nga imong ireklamo ngadto sa DOLE, ayaw kahadlok sa pagbarug sa imong katungod aron mahunong na kana’ng maong practice sa imong agency. Kun mahadlok g’yud ka nga moreklamo mahimo nga imong ipadala ang reklamo pinaagi sa suwat apan ayaw lang ibutang ang imong tinuod nga pangan apan ihatag sa DOLE ang complete name ug address sa agency ug ang detalye sa imong reklamo aron ilang ma-imbestigar. – Atty Divine