EDITORYAL – Towing angay’ng ibalik

Tungod sa nagkagrabe na nga problema sa trapiko dinhi sa dakbayan sa Sugbo karong panahona, angay na gayud nga ibalik sa pagpatuman ang pagpangguyod sa mga sakyanan nga ipataka lang pag-parking daplin sa karsada ug sa mga aseras.

Kinahanglang usbon na ni Mayor Michael Rama ang iyang baruganan ug nga imando niya ang paspas nga towing operation sama sa gihimo kaniadto atol sa administrasyon ni kanhi mayor Tomas R. Osmeña.

Angay usab nga ang grupo nila ni Tinago Barangay Kapitan Joel Garganera dili na magsupak-supak sa pagpatuman pagbalik sa towing operation kay niini’ng paagiha lang nga mahadlok ang mga motorista sa pag-abuso.

Bisan asa nga karsada ka mosuroy, adlaw ug gabii, makita nimo ang mga sakyanan nga gipataka lang sa pag-parking sa agianan sa mga sakyanan. Mag-unsa man nga si Mayor Rama kutob ra nga momando nga sulbaron ang problema sa trapiko apan dili momando og estrikto nga pagpatuman sa towing operations.

Kun imando man usab sa mayor ang towing operations, wala gihapo’y mahimo kay ang dakbayan aduna lay usa ka towing vehicle. Kini maoy angay hinuktokan sa mayor.