Mar-Grace tandem kuyaw

CEBU, Philippines – Hayag-hayag ang tandem nga Roxas–Poe sa 2016 presidential elections. Kini human mitumaw ang taho nga ang Malacañang mismo ang nanguyab sa kampo ni Sen. Grace Poe aron maoy ipares kang DILG Sec. Mar Roxas isip standard bearer sa administrasyon.

Ang Roxas-Poe tandem suportado usab sa administration coalition nga gipanguluhan sa Liberal Party. Si Kongresista Elpidio Barzaga Jr. sa Dasmariñas, Cavite nagkanayon nga kun mahinayon ang panagpares ni Mar ug Grace, mapadayon ang tulo ka mithi nga gisunod sa administrasyong Aquino – good governance, transparency ug accountability.

Dili kaha moreklamo ang kampo ni Grace nga ikatulo man kini sa survey?

Alang sa mga analyst, praktikal lang alang kang Grace kun mag-bise presidente lang una siya kay sa motuo siya sa hulhog sa uban nga mag-presidente.

Ang kataas sa survey dili paigo aron maoy basehan sa desisyon ni Grace nga mag-presidente.

Sama sa giingon sa uban, kulang ang iyang kasinatian sa panggobiyerno tungod sa kamubo sa iyang panarbaho sa Optical Media Board nga wala gani siya’y performance kay wala makasumpo sa nagkataas nga insidente sa piracy sa Pilipinas. Hinuon aduna siya’y kasinatian isip manager sa dakong korporasyon sa Silicon Valley, pero kulang gihapon kini.

Kun ma-presidente si Grace, kuyaw ilaron siya sa iyang mga sakop sa Kabinete nga mas bright pa kay niya ug mas adunay kahibalo sa mga binuang ug panguwarta sa Malacañang. Sama sa nahitabo ni kanhi presidente Joseph “Erap” Estrada diin sa iyang kamubo og salabutan, giilad ra siya sa iyang “midnight cabinet” pinaagi sa pagpapirma og mga mando bisan wala niya hisabti.

Kun bise presidente siya ni Roxas, mahimo siyang “check and balance” ug mahimo siyang guwardiya sa mga binuang sa gobiyerno aron maoy iyang gamiton isip portfolio sa iyang kampanya sa 2022 presidential elections.

Ang problema, mosugot ba ang mga Marcos nga hikawan sa damgo ni kanhi unang ginang karon Kongresista Imelda Marcos nga mobalik sa gahum ang mga Marcos?

Gusto kaayo ni Imelda nga sa dili pa siya motaliwan ning kalibutana, makakita siya sa pagbalik sa gahum sa iyang pamilya pinaagi kang Sen. Bongbong Marcos.

Apan sa dihang nabaniog si Grace nga anak sa gawas ni anhing diktador Ferdinand Marcos, daw dawat ni Bongbong ang pagka-popular sa iyang “manghod” ug hayan mosuporta kini unsay plano niini sa 2016.

Apan ning pagdayeg ni Erap kang Roxas, pun-an pa sa pag-float ni Grace nga i-tandem kaniya, mamasin ang kampo niini nga mosulbong kini sa mosunod nga mga survey.

Ang “command vote” ni Erap gikan sa masa maoy mo-aswat ni Mar.