EDITORYAL – LTFRB ug LTO nagkyugpos

Dili mga buta ang kadagkoan sa Land Transportation Office (LTO) ug Land Transportation Franchising and Regulatory Board (LTFRB) nga wala sila makakita sa grabe’ng problema sa trapiko.

Adunay mga paagi aron makatabang ang mga opisyal sa LTO ug LTFRB sa paghatag bisan og gamay’ng kasulbaran sa problema sa kahuot sa mga sakyanan diha sa atong kadalanan.

Apan imbes motabang sila pagsulbad sa problema, padayon hinuon sila mikyugpos sa ilang mga bukton ug midugang sa problema. Adunay lagda nga kadtong mga “running coffin” mga sakyanan nga grabe na kadunot, ilabi na og pasaheroan, dili na unta padaganon.

Gihimo ba gud na sa LTFRB? Ang tubag wala. Makita nimo nga puwerte’ng daghana sa mga PUJ nato ug mga bus nga gubaon na padayon nga gitugotan nila nga makadagan.

Ang LTO wala ‘say gihimo, wala na gani sila manakop. Hangtud sa miagi’ng Disyembre 31, miabot na og 652 mil ka sakyanan ang narehestro dinhi sa Central Visayas, kadaghanan dia sa Sugbo.

Ang mga gubaong sakyanan dili na g’yud angay’ng padaganon aron mamenus-menos ang mga sakyanan nga managan. Ikaduha, mga abusado’ng drayber dili na tugotan nga maka-drive.