Margot ug Mary Ann

Sa politika, ang higala nimo karon mahimo nga kaaway nimo inigkasunod eleksyon. Duna ‘say higayon nga ang kontra nimo sa miagi nga eleksyon mahimo na nimo nga kaalyado dungan sa pagpanglabay sa mga adlaw.

Ingon sa mao kini ang sitwasyon ni Konsehal Mary Ann De Los Santos ug Konsehal Margot Osmeña. Kaniadto, wala sila’y maayo nga relasyon kay si Mary Ann usa man sa mga lider sa oposisyon nga mikontra sa bana niini nga si kanhi mayor Tomas R. Osmeña.

Apan diha nga nagkauban na sila si Margot ug Mary Ann diha sa Cebu City Council isip mga konsehal, usa’g-usa kanila nakakita nga managsama diay ang ilang katuyoan—alang sa kaayohan sa kadaghanan.

Mao kini ang rason nga dali ra sila nga nagkasuod ug gikan sa pagka higpit nga kontra sa politika, suod na kaayo sila sa pagka karon. Gani nagpakuha pa sila og hulagway nga nagtupad nga puno sa kadasig ang mihulma sa ilang mga panagway.

Samtang si Mary Ann ingon sa wala nay maayo nga pagtinagdanay og ni Mayor Michael Rama nga pangulo sa ilang grupo – ang Team Rama.

Mabantayan nga kaniadto, kanunay si Mary Ann nga mag-adtoan sa opisina sa mayor, apan ning milabay nga mga buwan bisan anino wala na.

Usa ka suod kaayo sa mayor nagpalakaw og mga tabi nga si Mary Ann kuno gusto nga modagan pagka vice mayor ubos sa BOPK ug mao nga nakigsuod kini kang Margot.

Gipakapinan pa og sulti nga si Mary Ann wala g’yuy dag-anan ni Vice Mayor Edgardo Labella nga usa ka abogado kay kuno si Mary Ann wala gani makapasar sa Bar.

Kini maoy mga punto nga angay bantayan ni Mayor Rama. Imbes am-aman nila ang sakop nga talipahawa na sa ilang grupo, pasakitan na man hinuon ug maoy rason nga mosamot nga mopalayo kini kanila.

Kun si Mary Ann mawala sa Team Rama, nalantawan nako ang dako’ng problema ni Mayor Rama sa umaabot nga eleksyon sa 2016. Gitamod si Mary Ann sa iyang mga dumadapig sa Lahug.

Tungod sa kamaayo ni Mary Ann nga midumala sa barangay gikan sa iyang pagka konsehal sa barangay hangtud nga nahimo’ng kapitan, ang mga tawo miyukbo na kaniya.

Sa ato pa, kun asa si Mary Ann, ang iyang mga diehard supporters sigurado nga mosunod kaniya. Nagpasabot nga ang labaw ni Rama kang Tommy sa miagi nga eleksyon, kaya kaayo nga anha pa lang sa Lahug makuha na’ng daan.