EDITORYAL - Nawala tungod sa piso

Hapit na ang Pasko, namatikdan nga sahi niadtong nanglabay nga mga tuig mingaw kaayo ang palibot gikan sa naglanoglanog nga pabuto. Samtang na-miss sa kadaghanan ang mga pabuto nga maoy tilimad-on sa taliabot nga kapaskohan, nakaginhawa og tarong ang mga ginikanan tungod kay nagtuo silang layo ra sa disgrasya ang ilang mga anak.

Apan dili kini tinuod, kay wa magpasabot nga kadtong  katuigan nga menos ang madungog nga mga buto, wala nay nangadisgrasya. Sa miaging tuig, 2013, ang Department of Health nakatala og kinatibuk-ang 962 ka biktima sa pabuto, mas taas kini itandi sa 943 nga biktima sa pabuto sa tuig 2012. Hinuon arang-arang gihapon kini itandi sa dekada 90 ug 80 diin pwerte g’yung daghana ang nabiktima ug namatay.

Sa maong mga tuig, nimenus na ang mga pabuto gikan Septiyembre hangtud na sa pagsud sa Disyembre.

Ang mga biktima nakapalit og mga pabuto gikan sa mga lamesa-lamesa lang nga namaligya og pabuto, kanang mga ambulant vendors nga tinago-tago kay nangiyawat sa ginansya. Kinahanglan nga ang mga barangay officials muhimo og mga lakang batok kanila tungod kay bisan tuod og ginagmay ra ang ilang baligya, wala kini magpasabot nga dili makaangol, makabuta ug makapatay ang ilang baligya. Gikan kaniadto, pila ka libo na ka mga bata ang nawad-an og kaugmaon tungod sa pagkapungkol, pagbuta, ug pagkahilo, tungod sa pabuto nga nagkantidad lang og piso-piso?

Karong kapaskohan sa 2014, unta ang mga manindahay niining mga pabuto maghuna-huna dili lang sa kitaon, kondili, hunahunaon unta nila ang dangatan sa mga batang mabiktima sa ilang baligya.