EDITORYAL - Negosyo sa prisohan

Nabisto na sa Department of Justice (DOJ) nga padayon gihapon sa ilang ilegal nga mga kalihokan ug negosyo ang mga high profile drug lords nga napaslak sa New Bilibid Prisons sa kaulohan.

Kaniadto "open secret" na kini apan wala lang g'yuy nangursonada pagseryoso sa maong sekreto, nga ang mga drug lords nga nangadakpan, nagpadayon gihapon sa ilang ilegal nga negosyo sa drugas.

Sa sulod sa NBP, gwardiyado sila, pinakaon pa, makapalit gihapon sa ilang gusto ug makapadayon sa ilang bisyo ug negosyo.

Dili ni mosanay og ingon niini kun walay mga balhibuon og mga kamot nga nagdawatan og suborno gikan niining mga drug lords.

Numero uno niini nga angay manubag mao ang prison director, mga personnel sa Bureau of Corrections nga nadestino sa maong prisohan.

Ang nahitabo sa NBP nagpakita lang sa kahuyang sa sistema sa atong mga prisohan. Bisan ang mga lokal nga mga prisohan nga ubos sa Bureau of Jail Management and Penology angay 'sab nga susihon.

Daghang mga cellphones ug uban pang kontrabando ang nangasakpan sa sud sa pipila ka prisohan dinhi sa Sugbo.

Pinaagi sa cellphones, makamando gihapon ang mga dinakpang drug lords sa ilang mga sakop diha sa gawas aron padayon ang ilang negosyo, ang nakadeperensya, di na sila madakpan pa pag-usab.