Sideline sa mga guwardiya

Kun nakasulod man gani ang daghang cellphones diha sa bilanggoan, dili na kita mahibulong kun ang shabu nakasulod ‘sab.

Sa laktud nga pagkasulti, kunsabo ang mga guwardiya maoy hinungdan niini. Dili angay pahalipayan nga ang mga custodial guard sa Cebu Provincial Detention Rehabilitation Center (CPDRC) abi kay nasakmit nila ang kapin 300 ka cellphones.

Kun ako pa’y gobernador sa Sugbo, silotan hinuon nako kadto’ng mga guwardiya nga maoy tig-inspection sa mga mosulod sa bilanggoan.

Bakak ang ilang giingon nga ang cellphone puston kuno’g selopin unya pailadman sa kan-on. Adto na isulti sa mga ignorante sa pamaagi sa pagdumala og bilanggoan.

Apan alang sa mga wala pa masayud, kun adunay mga kan-on ug mga sud-an nga dad-on sa kabanayan sa mga binilanggo, hilngon g’yud tawon sa mga guwardiya pinaagi sa pag-ukay g’yud pag-ayo.

Kun adunay cellphone nga gipailadman sa kan-on, dili kaha maigo inigtuslo sa kutsara? Tell that to the dead marines!!!

Ang tinuod, sideline kini sa mga mapahimuslanong binilanggo nga motugot sila nga makasulod ang mga cellphones ngadto sa bilanggoan basta adunay bayad.

Husto ang giingon sa akong amigo nga dili angay’ng pasalamatan ni Governor Hilario Davide III ang mga guwardiya abi kay nasakmit nila ang mga cellphones.

Angay sila nga patubagon kun ngano nga nakasulod ang mga cellphones. Kun ingon man niini ang sitwasyon, dili imposible nga nakasulod ‘sab ang daghang shabu diha sa CPDRC.

* * *

Angay nga malipay si Mayor Michael Rama kay akong nahibaw-an nga P12 Bilyones kapin ang aprobahan sa Cebu City Council nga Annual Budget 2015.

Apan sigurado ko nga dili malipay si Mayor Rama tungod kay daghan kaayo nga mga kondisyon nga gibutang sa Annual Budget.

Sa ato pa, dunay mga proyekto nga dili mahimong ikapatuman gawas lang kun ang yuta sa SRP nga maoy gitumbok nga “sources of income” niini mangahalin.

Sa ato pa dili mosugot ang kinabag-an nga sakop sa City Council nga unahon pagpatuman kadto’ng mga proyekto nga ilang gitan-aw nga dili kaayo dinalian.

Aw, husto man ‘sab. Sama sa pag-hire og dugang kawani nga ang uban wala na’y klaro nga trabaho. Ayaw na lang ko pangutan-a kun si kinsa kini sila.

Karong buntag diskutihon sa City Council ang Annual Budget 2015 atol sa sesyon sa mga konsehal.

Sigurado g’yud hinuon ko nga adunay dako’ng lantugi karon atol sa sesyon tali sa mga konsehal nga alyado sa Team Rama ug BOPK.