EDITORYAL – Patagam sa highway patrol

Gimando na nga dakpon ug prisohon ang duha ka opisyal ug usa ka sakop sa PNP Highway Patrol Group (HPG) nga gipasanginlan nga nalambigit pagpatay ni Atty. Noel Archival.

Maayo unta og ang kaso nga giatubang nila ni Senior Superintendent Romualdo Iglesia, Senior Inspector Joselito Lerion ug PO1 Alex Bacani magsilbi unta nga leksyon sa ubang mga opisyal ug kawani sa kagamhanan nga dili magpasagad sa ilang trabaho.

Kun tuohan ang argumento sa tulo ka HPG personnel nga wala sila’y kalambigitan pagpatay ni Atty. Archival, ang pangutana kun kinsa man diay ang migamit sa sakyanan nga giilis-ilisan lang og plaka human gipagawas gikan sa impounding area sa HPG diha sa Lahug ug gisakyan sa mga kriminal?

Gibutyag sa kadagkoan sa National Bureau of Investigation (NBI) nga nag-imbestigar sa kaso nga usa sa mga kotse nga nakuha nila gikan sa impounding area sa HPG aduna pa’y kapsula sa M16 rifle nga mitukma sa armas nga gigamit pagbanhig ni Atty. Archival.

Ang mao nga kotse dili kadto iya sa HPG. Gitanggong ra ang sakyanan sa HPG kay ang tag-iya nakahimo kuno og kalapasan. Ngano’ng didto sa pula nga kotse nakit-an man ang suwat nga gipadala ni Atty. Archival ngadto sa mga opisyal sa HPG nga adunay kalabotan sa gipasaka sa abogado batok kanila?

Base sa logbook sa guwardiya nga anaa karon sa NBI, ang mga HPG personnel mogamit-gamit ra diay sa mga sakyanan nga ilang gi-impound. Kadto maoy dakong tamparos sa mga HPG personnel nga imbes magtinarong naghimo na hinuon og binuang.

Angay g’yud sila nga dakpon ug tanggongon sa bilanggoan.