Sunod nga super typhoon?
Mao pa lang gani pagbiya sa bagyong Queenie, may lain na sang hulga sa kahimtang sa panahon sa Pilipinas. Di lang usa. Kun dili duha. Ang una di hinuon makahulga sa Sugbo. Gikatakdang makasud na sa Philippine Area of Responsibility (PAR) isip low pressure area (LPA) karong weekend. Ibabaw na hinuon kaayo nga ang Luzon maoy maapektahan.
Ang ikaduhang bagyo maoy mas kusog ug maoy angay’ng kabalak-an sa mga Sugbuanon. Nipasidaan si Direktor Oscar Tabada sa Pagasa-Visayas dunay kahigayonan nga ang ikaduhang bagyo mamahimong super typhoon. Laing tinubdan sa kabalaka mao ang dakong kahigayonan nga maigo niya ang Sugbo.
* * *
Kun mahimong bagyo ang unang LPA, nganlan siya og Ruby ug ang ikaduhang bagyo nganlan og Seniang. Bisan unsa pay ngan sa umaabot nga katalagman, nahadlok si Tabada nga ang sinugdanan sa bagyo ug ang ruta nga gitakdang subayon susama gyud sa agianan ni Pablo, ang kinakusgang bagyo nga niigo sa Mindanao.
Naghagiyos sa gikusgong 280 ka kilometro matag takna, gigusbat ni Pablo niadtong Disyembre 3, 2012 ang Davao Oriental, Compostela Valley ug kasilinganang mga lalawigan sa habagatan ug tungatungang Mindanao: Kapin sa 600 ang nangamatay ug kaliboan ang nawad-an og mga pinuy-anan. Kasagaran nila wa pa hingpit nga makabangon hangtod karon.
* * *
Sama ni Pablo, ang bag-ong bagyo nagsugod duol sa equator ug nitidlom pa gyud dayong tugpa sa yuta nga niabot sa kinaubsan nga latitude nga 7.4 degrees north. Sama ni Pablo, nagsugod ang ikaduhang bagyo dayong tapos sa Nobiyembre. Gibanabana ni Tabada nga magsugod siya og hasi sa Pilipinas karong Disyembre 4 o 5.
Ang orihinal nga destinasyon ni Pablo mao ang Sugbo ug Central Visayas. Apan dihang nagkaduol na sa Surigao, niliko siya paubos paingon sa Davao, inay nga mopadayon sa iyang pagsaka paingon sa Kabisay-an. Nabalaka si Tabada nga kining umaabot nga bagyo di sama ka kahibulongan ni Pablo ug posibleng mosubay na gyud sa mas kasarangan nga ruta paingon sa Sugbo.
* * *
May igo pa hinuon tang panahon sa pagpangandam. Apan kinahanglang magsugod karon dayon. Ang mahinungdanong mga leksiyon ni Pablo duha ka tuig ang nilabay ug ang mas lab-as nga mga pagtulon-an sa bagyong Queenie sa niaging mga adlaw hinaut nga makatabang sa paggiya sa atong pagpangandam.
Way nakalas sa pagsanap sa dagkong bawod sa gatosan ka kabalayan sa Jagna ug kasilinganang kalungsoran sa Bohol kay namakwet nang daan ang mga molupyo. May nakalas sa pagsuyla sa mga suba sa habagatang Sugbo kay nagdumili pagbakwet ang mga molupyo ug napakyas ang gobiyerno pagpabalhin nila sa mas luwas nga mga dapit. Hinaut nga mas mabinantayon nang mga opisyal sa gobiyerno ug ang katawhan kun simbako mahinayon si Ruby o si Seniang.
- Latest
