Kinsa’y talawan?

Human sa dakong kadaugan ni Manny Pacquiao didto sa Macau, China kaniadtong Domingo, init nga mitumaw na usab ang isyu mahitungod sa gikahinamang kumbati tali sa Pilipinong boksidor ug Amerikanong kampiyon nga si Floyd Mayweather.

Gani gihagit ni Pacquaio si Mayweather human niya gipatumba og kaunom ang Amerikanong si Chris Algieri didto sa Macau. Higayon na kuno nga masaksihan sa kalibotan ang giingong labing dako nga kumbati sa ring karong panahona. Sa akong pagsulat niini, nagpaabot pa ang tanan sa tubag ni Mayweather sa maong hagit ni Pacquiao. Aduna siya’y gi-post sa Instagram apan bugalbugal lamang kini, sama sa nangagi niyang mga post.

Iya bang dawaton sa katapusan ang maong hagit? Wala pay usa nga nasayod. Hinuon naanad nga magpagoryogoryo kining maong Amerikano sa aghat alang kaniya ug Pacquiao pagharong aron pagtino kun si kinsa gayud ang tang-an nilang duha.

Apan kun madayon gayud ang ilang sangka ibabaw sa ring, mao na kini ang labing dako kun ang kuwarta ang hisgotan. Gani adunay pangagpas nga mokabat sa usa ka bilyon ka dolyar ang salapi nga ma-involve niini.

Tungod kay ang tibuok kalibotan naghinamhinam na niini, gitagna nga maapsan pa niini ang kita sa pay-per-view sa sangka nilang Oscar dela Hoya ug Mayweather kaniadtong 2007, diin midaug si Mayweather.

Apan tungod sa kumbinsedong daug ni Pacquiao batok kang Algieri, basin kun mokakak na gayud si Mayweather. Hinuon daghan ang daan nang wala mobilib ni Algieri. Linghod pa kuno kini ug dili gayud makasugakod sa ka agresibo sa Pilipinong  kampiyon.

Daghan sa mga eksperto ang mitagna nga dili gayud magsilbi si Pacquiao batok ni Mayweather. Espesyal kuno ang wala pay pilding Amerikano tungod kay maayo kini modepensa. Mas epektibo kuno kini kay sa puro opensa ni Pacquiao, kinsa kulang usab sa depensa.

Hinuon bisan pa sa panagna sa uban, morag mitalaw man si Mayweather. Padayon kining nagpagoryogoryo. Daghan na hinuon ang nagduda nga mahadlok gayud kini nga malukapa sa ila unya nga sangka ni Pacquaio.

Andam na si Pacquiao sa maong away. Apan kun dili gayud kini madayon tungod sa  pagdumili ni Mayweather, nan klarong mitalaw gayud ang Amerikano.