EDITORYAL - Mendicancy Law of 1978

Gipahipos ni Cebu City Mayor Michael Rama ang mga libud-suroy sa siyudad sa Sugbo, kini nga lakang hagbay ra untang gihimo. Matag taliabot ang kapaskohan mabantayan nga modaghan ang mga libud-suroy sa mga kadalanan sa siyudad, dunay mamalimos, dunay manaygon, dunay uban mamunit og basurang makwartahan ug uban pa.

Ang Pilipinas hagbay rang dunay balaod nga Presidential Decree No. 1563 nga gipasar ni kanhi presidente Ferdinand Marcos. Ang tumong niini nga wagtangon ang mga libud-suroy sa kadalanan ug tabangan kadtong mga wala’y kapaingnan sama niadtong dunay kakulian sa pangisip ug giabandonar nga kabataan pinaagi sa mga programa sa gobiyerno.

Apan lutoson kadtong gusto lang g’yud maglaroy-laroy ug modawat lang og limpyo bisan baskog ilang lawas aron mangita og tarong nga trabaho.

Ang pagpamalimos sa dalan makapaubos sa dignidad sa matag Filipino, magtudlo kini nila nga magtinapolan, makat-on paghimo og krimen ug maabusahan sa uban.

Nasayran usab nga dunay mga libud-suroy nga naninda diay  sa aseras apan tapolan mamauli sa ilaha ug nagdala na g’yud og ilang katulganan.

Kining paghipos sa mga libud-suroy dili lang unta himuon matag taliabot ang kapaskohan o kun dunay dakong okasyon ang siyudad.

Trabaho sa Department of Social Welfare and Development ang paghipos ug paghatag og tagad kanila inabagan sa mga lokal nga kagamhanan.

Busa dili lang kay kutob usa ka adlaw ang pagpangita ug paghipos kanila kondili tibuok tuig kay mao kini ang nalatid sa balaod. Dili katarongan nga “kuwang og tawo,” “way kabutangan kanila,” ug uban pa, tungod apil kini sa tahas nga gisangon kanila.

Hunahunaon unta sa mga hingtungdang ahensya nga matag dunay langyaw nga makasugat og mga makililimos sa dalan, mo-reflect kini sa klase sa gobiyerno nga naa ang Pilipinas.