Kaluwas sa Pasko

Susama’ng sugilanon ang motumaw panahon sa Pasko. Sunog tungod sa sayop nga paggamit sa Christmas lights. Inahan nga naghilak human gitulis ang iyang pang-shopping alang sa pamilya.

Bata nga nawa’ sa shopping mall human nalinga ang mga ginikanan sa pagpamalit. Mga balay nga nabiktima sa akyat bahay gang ug uban pa’ng matang sa krimen nga kanunay nga motumaw panahon sa Pasko.

Samtang andam na ang tanan gikan sa dekorasyon hangtud na sa pagpamalit og regalo, ang labing maayo’ng pangutana nga tubagon—luwas ba ang katawhan atol sa pagsaulog sa pasko?

Daghang mga polis ang nakaposisyon na karon pa lang daan gikan sa checkpoint ug uban pan’g police visibility. Adunay mga tanod nga nakapuwesto na sa mga nagkadaiyang bahin aron lang di’ malutsan sa mga dautang elemento.

Apan bisan sa mga pagpangandam nga gihimo, malutsan lang gihapon ang mga tawo sa mga kriminal nga wa’y laing gibantayan mao ang mga tawo nga nalinga na sa pagpangandam sa kapaskuhan.

Dili maayong ipasuwabi lang ang mga pagpangandam apan kinahanglan nga susihon ang pagpakabana sa mga tawo mismo aron nga mahatagan og igo’ng kompiyansa ang katawhan sa ilang katakos sa pagpanagang batok sa dautang elemento.

Dili lang ang nagpusot-pusot nga “sale” sa mga tindahan ang angay nga atimanon karon sa publiko apan ang kaluwas sa balay gikan sa Christmas lights ug ang katakos sa pagpanalipod sa mga balay gikan sa mga kawatan o sa mga tulisan.

Ang labing dako’ng tahas karong Pasko wa’ lang sa mga tawo nga gitugyanan sa katungod sa pagsiguro nga luwas ang palibot sama sa mga polis ug mga barangay tanod, apan anaa sa matag usa aron masiguro nga luwas ang tanan nga mosaulog sa Pasko.

Apan sa usa ka komunidad nga adunay katakos sa pag-organisar sa mga tawo ug paghatag nila og katakos aron kapanalipdan ang kaugalingon, mas labing maayo aron nga mahatagan og igong kasigurohan ang matag usa.

Usa sa mensahe sa kapaskohan mao ang pagkamanggihatagon sa uban, labi na sa mga tawo nga dili nimo kadugo o kaila. Apan karon’g Pasko, di’ lang ni panahon sa pagpanghatag apan panahon ‘sab ni sa pagpangawat ug  pagpanulis.

Ug ang katawhan nga adunay igong katakos sa pagpanalipod sa kaugalingon ang labing dako’ng papel nga karon pa lang pangandaman ug barugan sa mga tawo.

Magmabulokon lang ang Pasko kun gawas nga malipayon uban ang pamilya, mas luwas ‘sab ang kasaulogan .

* * *

Email: [email protected] or [email protected]