EDITORYAL – Vicente Rama Ave.

Ang Vicente Rama Avenue angayan g’yud nga sementohon kay anha moagi ang mga dagko ug bug-at nga sakyanan ug mao nga kanunay lang maguba ang karsada kun igo lang nga aspaltohon.

Mao kini ang rason nga si Kanhi Kongresista Tomas R. Osmeña nangita g’yud og kuwarta ug nakakita siya og P400 milyones aron magamit sa proyekto kaniadto’ng 2012.

Apan tungod sa politika, gibabagan kini ni Mayor Michael Rama kay nagsingabot man niadto ang eleksyon ug aron walay mapakita nga proyekto si Osmeña ngadto sa katawhan.

Ang rason ni Mayor Rama nga nindot pa ang V. Rama Avenue, ang karsada nga gipahinungod sa iyang Lolo, bisan og mag-untol-untol na tawon ang mga sakyanan nga moagi.

Tuod, wala madayon ang proyekto. Gibalhin ni Osmeña ang gahin nga nakuha niya sa kaulohan alang sa pagpatukod og flyover project diha sa eskena Gorordo Avenue ug Sudlon Street.

Pagpangandam kini kay modaghan man ang mga sakyanan nga manglaktud gikan sa Guadalupe ug Capitol Site nga moagi sa Sudlon Street aron dili makasinati og traffic problem ang Gorordo.

Gibabagan gihapon ni Mayor Rama ang proyekto ingon man sa ubang tawo nga nagpatuo nga mikampanya pagpanindot sa Cebu.

Karon, napasemento man lagi ang V. Rama Avenue? Tungod ba kay wala pa’y eleksyon? Kun gihimo pa kini kaniadto, tingali human na ang proyekto ug nindot na ang pag-agi sa mga sakyanan diha’ng dapita.

Usahay ang kalamboan sa usa ka dapit mapugngan tungod lang sa pamolitika.