EDITORYAL – Problema ni Rama

Angay’ng dili palabyon sa administrasyon ni Mayor Michael Rama ang paghatag og pagtagad sa mitumaw nga tabi-tabi nga adunay nakakuwarta sa pagpaguba sa karaan nga Cebu City Medical Center (CCMC) building apil na ang pagpatukod sa bag-ong ospital.

Dili imposible nga gamiton kini nga isyu sa mga kontra sa politika sa mayor inig-abot na sa kampanya sa eleksyon unya sa 2016. Ang gikuwestiyon karon sa pipila ka mga konsehal mao ang pagkahanaw sa mga “scrap metals” nga naglakip sa mga kabilya ug uban pa nga puthaw gikan sa giguba nga CCMC.

Ang laing pasangil mao nga adunay mga tawo nga nakakuwarta aron pilion ang usa ka kontraktor nga tugyanan sa pagtukod sa bag-ong ospital. Sigurado nga wala’y kamatuoran niini nga mapakita apan dili usab angay lang nga ibaliwala.

Ang pagtugot sa usa ka pribado’ng kontraktor nga mutabang sa Department of Engineering and Public Works (DEPW) sa pagguba sa karaan’g CCMC building nga nakasinati og kadaut sa linog kaniadto’ng miagi’ng tuig, gihimo sa mga opisyal nga ubos sa pagdumala sa mayor.

Wala’y kuwestyon niini. Apan ang isyu kabahin sa paghatag sa mga scrap metal, sama sa mga bawog nga kabilya ug ubang mga puthaw ngadto sa pribado’ng kontraktor nga wala’y pagtugot sa Cebu City Council maoy mahulagway nga kuwestiyonable.

Ang mao nga mga puthaw nagkantidad og milyon-milyon ka pesos. Kun dili kini mahatagan og sulbad, dili imposible nga si Mayor Rama mag-atubang na usab og laing kaso nga ipasaka sa iyang mga kontra sa politika.

Kun kini mahitabo, dili imposible nga mag-atubang siya og problema sa pagtinguha niya nga masublian sa katungdanan.