Pinutos nga Tilapia

Maabtan gani ko og tingkaon sa lagyong dapit, magsusi gyud ko unsay kinalamian nilang putahe nga wa pa nako matilawi. Mao nga sa pagdunggo namo usa niana ka sayong buntag sa Dakbayan sa Ormoc sa Leyte gipalihug dayon namong drayber sa traysikol sa pag-adto sa kan-anan nga nagluto og pamahaw nga lunlon Ormocanon, kansang mga putahe wa pa namo matilawi sa Sugbo.

Mapagarbuhon siyang nitug-an namo nga mga barbekyuhan ang kinaham nga pamahawan sa taga Ormoc. Dihang giingnan namo siya nga daghang barbekyuhan sa Sugbo, gida mi niya og kan-anan nga dagko og kaldero apan nihit og pagkaon. Maong didto na lang mi mangaon sa inilang fast food chain.

* * *

Dayong paniudto, nakahukom ko nga mao nay mopili asa mangaon. Nagpahatod mi sa bantogang Sabin Resort. Inay mangutana sa waiters unsay kinakusgan nilang putahe, ni-order mi sa putahe nga maoy gibutang sa standee sa ilang Mario’s Restaurant: Tilapia nga Sinanglay.

Ilang gisilbi namo ang tambok nga Tilapia nga pinutos og dakong dahon, diriyot molapas sa dakong bandehado ug giligo og dalag (yellowish) nga tuno sa lubi. Kaingon namo nga lain na sang eksperimento sa way kinutoban nga pagsuway pagpangita og lahi sa lami sa Tilapia. Hangtod nga hapit mi makalimot sa among mga ngan pagsugod na og kaon sa lamian kaayong putahe.

* * *

Pagkahibawo nakong taga Opon ang ilang resident manager nga si Asterio Camilotes, samtang gamay na lang kaayo ang nahibilin sa putahe nga nahimong mas himalitan kay sa ubang mas kinaham namong mga putahe, nangutana ko niya giunsa paghikay ang tilapia. Matud niya ilang giprito ang tilapia, giputos og dahon sa Duwaw ug giduhigan og tuno.

Matud nila ang Duwaw abunda sa bukirang mga barangay sa Leyte. Maoy nakahimong mas lami sa tilapia tungod sa iyang kahumot ug gamay’ng pasumbinay sa kahang ug kabugnaw. Pagbalik nako sa Sugbo, nagpalaban dayon ko sa among katabang nga taga Leyte asa mi mangita og Duwaw. Giingnan ko niya nga wa siyang kakita og Duwaw sa Sugbo. Ug dugay pa siyang mouli sa Leyte.

* * *

Maong hinaot nga makasabot ka sa akong paglumpayat, pila ka semana human mi katilaw sa pinutos nga Tilapia, dihang nakabati  kong Bise Gobernador Agnes Magpale nga ang iyang imnon matag sayong buntag di na pinabukalan nga tangad kon dili luy-a ug gamot sa Duwaw.

Hinaot nga pasayluon kong Magpale nga nakalimot sa akong naandang hiku-hiko ug nidawat dayon sa Duwaw nga nahibilin sa iyang kusina. Gipatanom dayon sa among katabang kinsa, sa wa pa motuman, nikomentaryo una nga lisod nang mabuhi kay nagsugod na og kalaya. Kun simbako uwahi nang tanan hinaot nga makasabot si Magpale kun mokalit lang ko og butho sa iyang umahan sa Danao.  [email protected]