Ang ayurveda

Ang pulong Ayurveda nagkahulugan kini og“ ayur ”- siyensya (science), ang “ veda ”- kahibalo (knowledge). Sa ato pa- usa kini ka siyensya sa kahibalo. Naila kini nga usa sa kinaraang sistima sa pag-atiman sa panglawas o pagpanambal. Nagsukad pa kini sa India, mga 5,000 na ka tuig hangtud ron.

Didto sa nasud sa India, gihimo kining “integrated” o giusa ang tanang matang sa mga sistima sa panambal nga kombensiyonal ug tradisyonal. Didto sad sa Amerika, gitratar lang kini isip nga komplimentaryo o alternatibo. Apan duna nay daghan didto nga nagpraktis na gayud ining sistimaha sa Ayurveda.

Segun sa Ayurveda, lapad ang nasakop ining kahibalo sa pagpanambal, nga may halawom nga kalambigitan sa uniberso o kalibutan. Nga ang tinubdan sa gahum gisandig o gikuha nila pinaagi sa rituwal o ritmo (rhythms) diha sa balance sa kinaiyahan o inerhiya sa mga element sa lawas, hangin, kalayo, tubig ug ang kalibutan. Diin ang tawo nasakop ining natural nga kabalaoran.

Nga mao ang pagbalanse sa emosyon, sekolohiya ug pisikal. Kini mao ang nakapalig-on sa pundasyon sa kinabuhi. Nga kun di mabalanse ang kalikopan o kawanangan, mao sab ang mahitabo nga di mabalanse ang lawas, nga maoy hinungdan sa atong pagkasakit. Mao nga unang remedy nila sa panambal mao ang gikan sa tanom nga anaa sa palibot nga gipakaon kanato sa Dios.

Ang tumong sa Ayurveda mao ang pag-edukar sa kahibalo kun unsaon nga makab-ot ang pagtukma sa balance nga relasyon nato diha sa palibot. Dinhi gipasikad ang paglig-on sa atong hunahuna, lawas ug kalag o espiritu, nga naghatag og mekanismo sa lawas mismo nga may katakos sa pag-ayo.