Kuyaw mohupas ang karisma

Midalikyat na usab sa Cebu si Bise Presidente Jejomar Binay sa Sugbo sa niaging semana aron pagtambong sa mga kalihokan dinhi. Ug ikaduha na kini niya nga pag-anhi sulod lamang niini nga bulan.

Apan matag lugsong ni Binay dinhi, iya usab nga giyam-iran ang imbestigasyon sa Senado nga nag-awhag sa iyang presensiya aron paglinaw sa mga alegasyon sa corruption batok kaniya.

Gani nagkainit na karon ang Senate inquiry ug maka-expect ang katawhan sa daghan pang bomba nga mobuto sa pagpadayong pagligid niini. Apan gipili niyang dili motunga tungod kay gipamulitika lamang kuno kining maong Senate investigation sa iyang mga kontra sa pulitika.

Sa pipila ka adlaw niya nga pagtadlas sa Sugbo, busy usab ang bise presidente pagdepensa sa iyang kaugalingon sa mga akusasyon batok kaniya. Rason niya ngano nga dili gayud siya motambong sa Senate inquiry mao nga gihukman na kuno siya sa mga senador nga nagpasiugda niini.

Hinuon, dili usab kalikayan ni Binay ang magpa-display atubangan sa media. Sa iyang pagbisita sa kabarangayan dinhi, grabeng nakahungit ang bise presidente sa iyang pagsalmot sa mga boodle fight.

Tungod lagi kay posing dinhi ug posing didto, daghan ang nakamatikod nga mora na hinuon og nangampanya si Binay dinhi sa Sugbo. Matud sa mga tigpaniid, makamao gayud si Binay. Kay bisan pa sa mga alegasyon batok kaniya, mipaduol hinuon siya sa katawhan nga mora ba og wala maapektohi sa mga isyu.

Apan, sa laing bahin, ang iyang wala pagtunga sa Senate inquiry makapaagni usab sa mga pagduda sa katawhan. Gumikan niini, dili gayud kalikayan nga adunay mituo sa alegasyon sa corruption nga gihapak batok kaniya.

Mas labing maayo nga iyang personal nga atubangon ang mga isyu punto por punto aron nga makaingon ang katawhan nga seryoso siya sa iyang depensa. Kun dili man sa hawanan sa Senado, adunay daghang lugar diin siya makapabuhagay batok sa mga alegasyon.

Sayang nga wala madayon ang debate nila ni Senador Antonio Trillanes. Kay kun padayon nga magpagoryogoryo si Binay, kuyaw nga mohupas unya ang iyang karisma ngadto sa masa. Ug delikado ang iyang kandidatura sa sunod nga eleksiyon.