Kalag-kalag ni Binay

Papating. Mao na lay nahibilin nga panagang ni Bise Presidente Jejomar Binay sa way kinutoban nga mga pasangil sa pangurakot batok niya ug sa iyang pamilya. Di na man maato pagtubag ang nagkadaghan nga mga saksi ug mga dokumento, pabaga na lang ang ilang alkontra.

Kun wa pa kang kabantay, di na tinarung ang ilang tubag. Wa na magtagad katuohan pa bang ilang depensa. Panglawgaw na lang gyong salida. Naglaom tingali nga tungod sa kadugay na sa kontrobersiya, salamat sa ilang tuyuk-tuyok ug lipat-lipat, laayan nang katawhan. Hangtod nga mailog ang atensiyon sa publiko kun paminawong hugot nilang pangaliya nga may moulbong bag-o ug mas dakong eskandalo.

* * *

Nagsugod sila sa pagkuwestiyon sa imbestigasyon. Gipasanginlan nga namolitika ang nangimbestigar nga mga senador. Dihang nakadapit og mga saksi, nga niboluntaryo og mga dokumento ug ubang mga ebidensiya, gikuwestiyon nilang hurisdiskiyon sa Senate Blue Ribbon subcommittee. Dihang niinsistir sa pagpangimbestigar ang mga senador, nihulga si Binay sa pagdangop sa Korte Suprema.

Kay di man mahitabong pugngan sa labaw’ng hukmanan ang imbestigasyon sa Senado, bisan pa sa away sa mga mahistrado ug sa Malakanyang, wa mopasaka og bisan unsang kaso si Binay hangtod karon. Nagpalaban na lang sa kinatibuk-an sa Senate Blue Ribbon Committee. Apan nabawo na sab kay pormal na man hinuong giimbitar sa mas dakong komitiba.

* * *

Nakalimot tingali nga ilang gikuwestiyon ang hurisdiskiyon sa subcommittee, nikalit lang og butho ang mga tigpamaba ni Binay sa labing uwahing hugna sa imbestigasyon niadtong Huwebes sa buntag. Nisuway pagpayuhot og basa sa ilang pamahayag bisan way pagtugot sa mga senador.

Ganahan lang diay nga mopatumaw sa bag-o nilang linya: Kay giimbitar na man si Binay sa tsirman sa Senate Blue Ribbon Committee nga si Senador TG Guingona, angay’ng hunungon nang imbestigasyon sa subcommittee nga gipangulohan ni Senador Koko Pimentel. May sukaranan ang kabalaka unsa na say mahunahunaang lusot aron di motunga sa imbestigasyon sa mas dakong komitiba nga gitakda na sa Nobiyembre 6.

* * *

Kun naglaom si Binay nga makapasalipod siyang Antonio Tiu, nga nangangkong maoy tag-iya sa asyenda sa Rosario, Batangas, abundang mga timaan nga mapakyas na sab. Inay mohilom ang mga pasangil, nanuyhakaw’ng mga komplikasyon, nga mahimong makapasamot sa kaapiki ni Binay, kun mahinayong mga kasong atubangon ni Tiu sa Bureau of Internal Revenue (BIR), Department of Agrarian Reform (DAR) ug Securities and Exchange Commission (SEC).

Di mabasol si Binay nga mopahimus sa Kalag-kalag pagpangilaba nga di matultolan ang nagtagutago niyang mga batabata--silang Gerry Limlingan, ang gipasanginlang nagpalusot sa overpicing sa Makati parking building ug nagtago sa iyang kabtangan, ug Laureano Gregorio, nga giingong Tiu nga iyang kasabot ug ginganlang Binay nga tag-iya sa asyenda, apan kansang ngan wa igkita sa mga titulo. [email protected]